Håkon Leganger får Samlaget sin fortenestemedalje

På diplomet som følgjer med Samlaget sin fortenestemedalje står det «for langt og oppofrande arbeid for skyttarsaka».

«Håkon Leganger, Kvinnherad skyttarlag, har i snart to generasjonar gjort akkurat det – vore oppofrande i sitt arbeid for skyttarsaka. Håkon Leganger er ikkje den som stikk seg fram. Han har aldri hatt trong for å ta plass. Likevel er Håkon ein av dei som alltid er til stades. Uavhengig av formelle verv er han ein av dei som alltid er der, arbeider, får ting gjort, organiserer, maurar på. Skal noko gjerast stiller han – kvar gong», skriv Heidersprisnemnda i Sunnhordland skyttarsamlag i ei pressemelding.

Hjelpt andre

Det var på Samlaget sitt ombodsmøte på onsdag tildelinga vart gjort, og Håkon Leganger fekk overrekt utmerkinga dagen etterpå.

«Etter snart 60 år er Håkon enno ein aktiv skyttar. I lange periodar har han vore ein høgt rangert skyttar og han har vunne mykje, både individuelt og som lagskyttar for lag og samlag.

Håkon har hatt treningsdisiplin på eigne vegner, og i fleire tiår har han hjelpt andre til kvalitet på sine treningar. Håkon kan mykje om skyting og er raus med å dela erfaringar og kunnskap når han blir spurt. Men han er aldri påtrengande i stil eller belærande i sin kommunikasjon», står det vidare i grunngjevinga.

Utdelaren slår fast at gjennom sitt livslange medlemskap i Rosendal skyttarlag, og no siste åra i Kvinnherad skyttarlag, har Håkon Leganger lagt ned uvanleg mykje innsats i ulike lagsroller, i alt av praktisk arbeid knytt til skytebaner og anlegg, oppgåver i samband med stemne, samlingar og arrangement, og ikkje minst som aktiv skyttar.

Idealmedlem

«Håkon Leganger er på mange måtar eit idealmedlem for eitkvart skyttarlag. Ein verdig representant for desse uvurderlege lagsmedlemmane som stiller opp, deltek aktivt, får ting gjort og syter for at laget er aktivt og attraktivt. Det er med stor glede Sunnhordland skyttarsamlag tildeler Håkon Leganger Sunnhordland skyttarsamlag si fortenestemedalje», heiter det.