Guro vart nest beste norske i VM
Det vart ingen topplass på Guro Femsteinevik i søndagens VM-løp. Men å bli nest beste deltakar frå Norge er slett ingen dårleg prestasjon.
Publisert
Sist oppdatert
Søndag stod normaldistansen på programmet i junior-verdsmeisterskapen i skiskyting. Distansen var 12,5 kilometer med fire skytingar i skogane kring byen Otepää i Estland. I denne øvinga er det ikkje strafferundar, derimot eitt tilleggsminutt per bomskot.
Guro Femsteinevik frå Hatlestrand og Hålandsdal IL noterte seg for to feilfrie skytingar, men éin bom på andre skyting og to bom på siste, kosta dyrt. Til slutt enda ho som nummer 18. I mål var Guro 5.48,1 bak den tyske verdsmeisteren J. Tannheimer.
Annonse
Starta bra
Det starta bra for Guro Femsteinevik. Etter fyrste skyting låg ho som nummer 10, berre 30,2 bak teten. Etter andre skyting var ho nummer 14, men då hadde avstanden fram auka til 2.03,6. Etter tredje skyting hadde ho avansert til 12. plass, men tida hadde auka til 2.55,5. Så kom dei to bomma på siste ståande, og plutseleg var ho nede på 19. plass.
Men sidan Guro vart nest beste norske, den beste kom på 7. plass, er det godt håp om at det blir fleire startar i VM for hatlestrendingen. Programmet vidare består av sprint på onsdag, fellesstart på torsdag og stafett neste helg.
