Guro var sekund unna samanlagtsiger i cupen

Hatlestrand-jenta gjekk startetappen då Hordaland sikra seg ein overraskande stafett-triumf på Geilo. Kretsen var ikkje blant dei største medaljefavorittane. Det var Nord-Trøndelag med to World Cup-løparar og ein utøver som blei nummer fem på laurdagens fellesstart, Nordland og ikkje minst Nord-Østerdal som var ein soleklar gullkandidat etter to etappar. Hordaland, med to gode juniorar, overraska stort. Mykje på grunn av eit solid løp av Guro.

– Eg fekk det tøft i dei vanskelege vindforhold på ståande. Men det var fleire enn meg som sleit der. Det var utruleg stort at Ragnhild hadde ein så god dag, at ho var kapabel til å henta Juni Arnekleiv, sa Guro etter at ho hadde avslutta skiskyttarsesongen med NM-gull, eitt døgn etter at ho var med og kjempa om den gjæve samanlagtsigeren i klasse 20-22 år.

Der blei det jamt og spennande heilt til siste slutt. Fintellinga viste at Guro mangla fattige tre poeng på å henta heim det trofeet og den største pengepremien som blir delt ut. 2004-modellen la ikkje skjul på at det var litt kjedeleg at det ikkje blei siger då ho først var så nær å vinna.

Femteplass i finalen

– Eg var ikkje betre i dag, og då får eg ikkje gjort så mykje med at eg mangla dei tre poenga. Eg har gjort mitt beste i alle renna, og då må eg berre akseptera at det ble slik, sa fjerdeårsjunioren som i vinter har konkurrert med jenter som er eitt og to år eldre.

Guro har slått sterkt tilbake etter ein skuffande fjorårssesong. Den blei spolert av korona. I vinter har ho prestert jamt bra.

– Kva prestasjonar er du mest fornøgd med denne vinteren, Guro?

– Det er fleire renn eg er tilfreds med. Fellesstarten i junior-NM på Oppdal var eit av dei betre renna for min del. Stas var det også å bli tatt ut til junior-VM i Estland. Eg var i veldig god fysisk form under juniorverdsmeisterskapen, men det blei dessverre for mange bom, sa ho som gjekk på laget som tok stafettsølv.

Ser frem til ny sesong

Det gjorde at Hålansdalen-utøvaren fekk med seg éin medalje heim frå det tidlegare austblokklandet. Guro Femsteinevik har tatt steg både fysisk og på standplass i vinter. Ho ser fram til ei ny sesongoppkøyring, og har også lyst til å vera med på å prega juniorklassen neste år. Det kjem eit junior-VM både i 2025 og 2026 som Guro tar sikte på å kvalifisera seg til.

Det blir nokre litt rolegare veker i april før ho startar oppkøyringa til det som fort kan bli hennar beste sesong som skiskyttar. Det er få norske juniorjenter som har eit så stort potensial som den dedikerte kvinnheringen. Guro håper ho skal vera i stand til å få tatt ut det dei neste åra.