Guro slo sterk tilbake etter korona

Det er nemleg berre to av utøvarane i 20-22-årsklassensom slår ho på fellesstarten. Dagen før var ho best av alle norske juniorar på dette alderstrinnet. Det trass i at ho konkurrerer med dei som er eitt og to år eldre. Femsteinevik er ny i denne klassen, men beviser allereie den første konkurransehelga at ho har 20-22-årsnivået inne. For så vidt også seniornivået. Skytinga var det som stortalentet var mest fornøgd med.

– Eg lukkast veldig bra standplass både laurdag og søndag. På sprinten får eg ned ni av ti blinkar sjølv om det er utfordrande forhold. Det var heller ikkje mykje som mangla på at det siste skotet gjekk inn, ettersom det var ein hårfin bom. Like tilfreds var eg at eg fekk ned 18 av 20 blinkar på fellesstarten. Det syns eg er ganske så bra i ein setting som dette. Det gjekk litt tråare i sporet enn det gjorde på laurdag, men totalt sett er eg veldig fornøgd, sa Guro til Grenda.

Junior-VM er eit mål

Ho hadde ein kropp som ikkje spelte heilt på lag førre sesong. Den yngste av de tre toppidrettsutøvarane i familien fekk korona på haustparten. Ho klarte aldri å få opp farten etter det, og valte etter kvart å avslutta sesongen for å vea klar for ei ny sesongoppkøyring. Gjennom sommaren og hausten har Guro lagt eit godt grunnlag. Hun har forhåpningar om at det skal vera mogeleg å visa seg frem frå ei heilt annan side denne vinteren.

– Kva mål har du sett deg føre din fjerde juniorsesong, Guro?

– Det er først og fremst å halda fram utviklinga. Eg har forhåpningar om at det skal vera mogeleg å kjempa om ein junior-VM-plass, sjølv om det nålauga er trongare enn det har vore. For denne gongen må eg konkurrera om dei same plassane med dei som er eitt og to år eldre, sa Guro til lokalavisa etter to innhaldsrike døgn på Lillehammer. 19-åringen var både glad og letta.

Må trena på rulleski

Vinteren lar vente på seg på Hatlestrand og i Kvinnherad. Heller ikkje på den andre sida av fjorden kor hun trener ein god del er det snø. Derfor blir det mange rulleskiøkter framover. Førstkomande helg vil ho få snø under skia når teamet set kursen Geilo. Den påfølgande helga er det renn der, og i desember venter junior-VM-uttakingsrenn på Dombås. Dei blir viktige.

– Eg er glad sesongen er i gang no, ettersom det har vore ei lang sesongoppkøyring, sa Guro som mest truleg vil bli vanskeleg å slå for konkurrentane også denne vinteren.

Ho har gjort ein solid treningsjobb, og det ser veldig bra ut på treningsfronten for den ambisiøse tenåringsjenta.

AV: SVEIN HALVOR MOE

B-motivet

I FORM: Guro Femsteinevik gjorde eit solid inntrykk i sesongopninga. 19-åringen er tilbake for fullt etter en skuffande sesong i fjor.