Guro imponerte både storesøster og konkurrentane i sesongopninga

– Eg er utruleg imponert. Det ho gjer i dag er heilt rått. Både med tanke på at ho har to år igjen i juniorklassen etter denne sesongen, og ikkje minst at det er lenge sidan Guro hadde korona. Ho hadde store utfordringar førre vinter, og det er både artig og sterkt at ho slår såpass tilbake som hun gjer, sa landslagsløpar Ragnhild då veslesøstera hadde prestert karrierebeste.

Det kom som ein konsekvens av at ho hadde fått ned ni av ti blinkar og gått eit bra langrenn. Ni blinkar og ein treffprosent på 90 var ekstra sterkt med tanke på at det blåste så mykje som det gjorde. Det var det siste ståandeskotet som hamna utanfor blinken. Bommen var av det hårfine slaget.

Slo fleire sterke utlendingar

Dersom det skotet hadde gått inn og Guro hadde unngått strafferunden, så ville ho vore med og kjempa om ei topp ti-plassering. Det i eit renn som var viktig for alle norske seniorløparar, og samla mange utlendingar. Heile ni av dei som hamla opp med 19-åringen frå Hatlestrand har utanlandsk statsborgarskap.

– Dette er nok det beste som Guro har gjort. Ni treff, eit bra langrenn og ei god plassering i dette selskapet, er veldig sterkt, sa Ragnhild som følgde rennet frå TV-stolen.

Ho skulle aller helst hatt startnummer på seg og vore på Sjusjøen, men testa positivt for korona, og fekk forståeleg nok startnekt denne gongen.

Håper å slå sterkt tilbake

– Guro kom sterkt tilbake etter at ho hadde korona. Forhåpentlegvis så gjer også eg det, sa Ragnhild som håper å vera i trening om ikkje alt for lenge. Det er første gong at Guro deltar i det internasjonale opningsrennet. Ho har ikkje vore gamal nok tidlegare. For å få sjansen i den settinga må ho konkurrere i 20-22-årsklassen, og det skal stortalentet frå Kvinnherad gjera i vinter.

Fornøgd var også Guro, som fekk dei svara hun håpte på. Ho har allereie begynt å gleda seg til søndagens fellesstart. Takka vera laurdagens flotte prestasjon, får ho ein god startposisjon på søndag.