Guro blir å rekna med i vinter

Det er svært så godkjent med tanke på at 20-åringen held junioralder i to sesongar til. Det er fyrst om to år ho blir senior, og vonleg får konkurrera jamleg med Dorotea Wierer og fleire av verdas beste skiskyttarar. Den lokale landslagsløparen er innstilt på å bruka dei to åra på ein fornuftig måte.

Guro har det siste året hatt veldig fin progresjon i treningsarbeidet. Det fekk vi sjå eit resultat av i dei internasjonale opningsrenna på Sjusjøen.

– Eg er godt nøgd med veldig mykje av det eg gjer i helga. Eg tar med meg at farten i sporet var bra. Liggjandeskytinga var det heller ikkje så mykje å utsetja på. Men ståandeskytinga var dessverre alt for dårleg til at eg klarte å ta vare på det gode utgangspunktet eg hadde opparbeida meg etter liggjandeseriane. Eg har inga god forklaring på korfor det vart slik, seier Guro, som har hatt mange gode skyttaropplevingar på trening.

Både raskt og bra

Landslagstrenarane er klare på at Guro Femsteinevik i norsk målestokk skyt både raskt og bra. Dei synest derfor ikkje det er nokon grunn til å vera bekymra sjølv om det var ein god del skot som hamna utanfor blinken da ho skaut ståande på laurdag og søndag. Guro kunne ha brukt den utfordrande vinden som unnskyldning. Men det gjorde ikkje stortalentet sjølv om vinden var vanskeleg å lesa. Sterk vind førte elles til at laurdagens start vart utsett i nokre timar.

– Eg er nøydd til å jobba meir med ståandeskytinga inn mot dei neste renna som blir på Geilo for mitt vedkomande. Eg har relativt god tid på meg til å få orden på ståandeskytinga. Det er fyrst når det er norgescupopning og junior-VM-uttak på Lygna før jul at det blir viktig å gjera det bra. Sjølv om eg alltid prøver å henta fram mitt beste i renn, seier Guro, som er glad for at ei veldig lang sesongoppkøyring går mot slutten.

Konkurransenervane

Den starta i mai og har strekt seg over nesten sju månader. Godt er det også å få kjenna på konkurransenervane. Spenningsnivået er gjerne litt høgare i samband med sesongopninga enn når det er renn nesten kvar helg. For Guro er seniorane si internasjonale sesongopning fyrst og fremst ei fin moglegheit til å få føla på det internasjonale seniornivået. Hennar langsiktige mål er å bli så god at ho jamleg får konkurrera i den settinga.