Gull-jentene frå Strand-Ulv: – Dette var kjempegøy

– Dette var veldig gøy, seier jentene på telefon like etter finalen er ferdig.

– Eg er heilt shaky, seier Lilli.

– Me var litt stressa fordi alle såg på oss, men hadde god kontroll i første settet. Me måtte jobba meir i andre settet, fordi motstandaren fekk servar og teknikk betre til, forklarer dei.

J15-NM blir spela på ein mindre bane enn i dei andre klassane, noko som merkast for spelarane på begge lag, mellom anna ved at fleire servar gjekk ut.

– Det er veldig uvant med mindre bane. Me tenkte å pressa dei på våre servar, og tolte at nokre gjekk ut, seier dei.

Seinare i kveld skal dei får gullmedaljane sine, og så skal dei ut og eta på Egon.

– No er det nusstilla seg og gå laus i J17-NM i morgon. Der er det større bane igjen, og litt annleis måte å spela på, smiler dei gjennom telefonen.

Teknisk gode

Tidlegare på i dag torsdag tok det seg komfortabelt til finalen, og der heldt dei fram slik dei har gjort i heile meisterskapen. Ikkje eitt sett er gitt vekk, sjølv om det var finalen det var snakka om.

Jentene tok grep om opningssettet frå start. Det inkluderte ein lengre servesekvens der Lilli Aksnes-Øystese trykka på og sette motstandaren under eit uimotståeleg press. Strand-Ulv-jentene vann settet fortent 21-10.

Andre settet var jamnare, og Tiril Våg Skjold og Zara Vaigafa på andre side av nettet heldt følgje fram til den tekniske time outen på leiing 11-10 til Hatlestrand-Varaldsøy-alliansen.

Etter time outen starta Strand-Ulv-laget best og skaffa seg ei lita luke. 18-14 vart til 18-17, men pendelen svinga seg tilbake til 20-18-leiing. Første matchballen vart slått ut, men på andre forsøk sat avsluttinga som han skulle. 21-19 var eit faktum, og gullet kom heim til Kvinnherad.

Det var den beste måten å følgja opp bronsemedaljen frå i fjor for duoen.

I tillegg til gullet fekk jentene mykje skryt av kommentatorane på vegen vidare. Dei trekte fram veldig høgt teknisk nivå på ballbehandlinga til Aksnes-Øystese og Sandvik Rørdal, i tillegg til smart angrepsspel.

Tidlegare i dag måtte Eirik Gjuvsland Skjelnes og David Eikeland strekkja våpen i semifinalen i G15-klassen, og måtte også sjå seg slått i bronsefinalen.