Gode som gull

Laurdag spelte HU-laget til KHK to kampar i den såkalla Gullserien. God stemning på tribuna og stor innsats på banen gjorde turneringa til ein suksess.

– Dette er ein stor dag for alle involverte, sa oppmann Kenneth Sjo Lie før det braka laus.

Fem klubbar var representerte i Husneshallen.; arrangøren Kvinnherad handballklubb, Stord, Sandviken, Askøy og Sotra. Heimelaget stilte med nesten heile troppen sin, då 15 av 16 spelarar var med.

– Dei er nok spente på korleis det går og kor mange som kjem og ser på, fortalde oppmannen.

– Eg håpar vi vinn, kommenterte keeper Ståle Mehl.

 

Ståle betong

Ynsket om mykje publikum vart oppfylt, medan det ikkje gjekk like bra med draumen om sigrar. I fyrste kampen vart Askøy for gode, og var heile tida nokre mål føre. Men Ståle Mehl leverte fleire gode redningar undervegs, og kunne gle seg over at publikum ropte ut kallenamnet hans «Ståle betong». Jan Tore Johnsen briljerte i andre enden av banen med susande kast som hamna i mål.

– Dei mista litt motet etterpå, men det kom seg til neste kamp, sa Kenneth Sjo Lie.

Då stod Sotra 2 på motsett banehalvdel. Stillinga var jamn store deler av oppgjeret, men gjestene kunne jubla til slutt.

 

Motiverte

Kenneth Sjo Lie styrer laget saman med trenar Lillian Solheim. Trening er det kvar måndag. Fyrstnemnde har vore med sidan september.

– Det er veldig kjekt og gjevande, og eg føler eg reint personleg har mykje igjen for det. Spelarane er i stadig utvikling både handballmessig og sosialt. Dei er flinke og motiverte, roste han.