Gjekk heilt til topps i NM
Emma Sandvik Rødal og Lilli Tuften Aksnes-Øystese er norgesmeistrar i sandvolleyball etter at dei snudde setta ved to høve, og gjekk sigrande ut av finalen torsdag kveld.
Publisert
Sist oppdatert
16-åringane frå høvesvis Varaldsøy og Hatlestrand presterte feilfritt i J17-NM, men hadde spesielt to kampar der dei måtte grava djupt for å vinna. Den eine av dei var finalen mot sunnmøringane Cathrine E. Eikeland og Birte E. L. Krumsvik, som hadde notert seg for semifinalesiger over Strand-Ulv-jentene Maren Næss Våge og Iselin Nilsen.
– Det vart ein veldig tøff start, og me låg under 7-0 då me bytta side. Ikkje så bra. Klarte å byggja oss opp og ta settet 21-19 til slutt, fortel Lilli Tuften Aksnes-Øystese på telefon frå hovudstaden.
Annonse
Spennande finale
Emma og Lille gav vekk andresettet til sunnmøringane, som tok grådig i mot og vann det 21-14.
– Me tenkte me ville ha tre sett for å gjera det litt spennande, fleipar Lilli før ho blir seriøs igjen:
– Dei hadde overtaket i starten på alle setta, meiner eg, men me kom oss tilbake i to av tre, legg ho til.
Annonse
Strand-Ulv-jentene viste råsterk psyke og mentalitet, og kom tilbake nok gongar til å vinna finalen også. Turneringa oppsummert viser at dei har vunne sju av sju kampar, og berre gitt vekk to sett totalt.
– Kvartfinalen var veldig vanskeleg. Då tapte me første settet helst mykje, og andre settet vann me med minst mogeleg margin, fortel ho.
– Godt miljø
Jentene styrer det sportslege i turneringa 100% sjølv.
– Mamma er med på sidelinja, og hjelper og støttar oss, men me legg opp taktikken. Det er sjukt gøy at me får det til som me vil, smiler ho.
Lilli er ikkje berre nøgd med eigen innsats, ho er også begeistra for det lagvenninnene Maren (15) og Iselin (14) har fått til.
Annonse
– Imponerande at dei kjem så langt som til semifinale når dei enno har eitt og to år igjen i denne aldersklassen. Har trent mykje saman dei som kan i sandhallen på Hatlestrand. Det er gøy at me har eit så breitt og godt miljø Strand-Ulv, slik at mange kan bli gode – og det er mange som blir, kommenterer Lilli.
Turneringa byrja for hennar del måndag morgon klokka halv ni, og var ferdig torsdag kveld. Fredag morgon var det på han igjen.
– Eg skal tevla i U18-NM utover helga. Emma er med i U21-klassen og får verkeleg brynt seg, sluttar den eine av gullvinnarane.
