Generasjonsskifte i Trio - Martin (26) er blant dei eldste på seniornivå

– Sjølvsagt veldig kjekt, men vi er mange som kunne delt på denne, smiler Martin Lygre på telefon med Grenda.

Han peikar spesielt på lagkamerat Åsmund Voster, som ein kan sjå hamna på ein 2. plass på Grenda-børsen, med sine 20 G-ar. Lygre meiner han har vore spesielt viktig, både på og av banen.

– Fotball er ein lagsport, og det er ikkje berre éin spelar som ber eit lag. Det er sjølvsagt kjekt å bli sett pris på, men vi er heilt avhengige av alle spelarane på laget.

Travelt

Han sit på båten på veg heim frå Bergen idet Grenda ringer. Der har han vore på undervisningssamling ved Bergen tekniske fagskule.

– Det er travelt, men det går, ler han.

Ei veke annankvar månad må han pendla til byen. Resten av tida jobbar han hos Fagne, og sit til dagleg på kontoret deira på Landa på Halsnøy.

Han håpar at han også den komande sesongen skal ha tid til fotballen, men vedgår at det er jobben og studia som må koma først.

– Eg har sagt at eg skal vera med så mykje som eg klarar. Det blir litt tøft til tider, og eg må vera dedikert med sjølvstudia, for det er mykje anna det heller freistar å bruka tida si på enn skule, fortel han med eit smil.

Nedrykk

Trio måtte etter sesongen innsjå at nedrykk frå 4. til 5. divisjon var eit faktum, men Lygre meiner at laget ikkje høyrer heime der.

– Vi kom seint i gang med sesongen vår, og var svake i starten. Vi fekk eigentleg ei bra avslutning, og eg meiner vi burde ha lege midt på tabellen, seier han om nedrykket.

Eldst

Mange av dei gamle travarane valte denne sesongen å kasta inn handkledet, noko som har gjort at yngre krefter har fått sleppa til.

– Vi har hatt eit realt generasjonsskifte i spelarstallen, og snittalderen på laget har gått betrakteleg ned. Vanlegvis får nye spelarar dyppa tåa litt uti det, men i år har fleire blitt kasta ut på senior-nivå frå start. Det har vi vore heilt avhengige av for å i det heile klara å stille med lag. Men no som vi har fått køyrd oss litt inn, og ting byrjar gå seg til, ser eg lyst på den komande sesongen, seier han.

Det har gått åtte år sidan han kom til klubben som 18-åring, og allereie i ein alder av 26 har han blitt ein av dei eldste på laget.

– Eg har forståing for at folk må leggja opp. Med arbeid og familieliv skal det noko til å få ting til å gå rundt. Eg har derimot ikkje planar om å gi meg, seier han, som starta sesongen som spiss, og enda den som venstreback.

To damer

Vi spør Lygre om han har nokre siste tankar før vi rundar av intervjuet.

– Det er veldig kjekt med G-ar, altså, men eg hadde byta dei i ekstra poeng denne sesongen om eg hadde kunna, smiler han.

Martin Lygre er ein høgst verdig vinnar av tittelen «Årets spelar 2024». Men vi kan røpa av viss ein deler G-ane på talet kampar, så hadde to damer kome fyrst; Celine Musland føre Silje Soldal.