Furdal blir assistenttrenar: – Dette triggar meg enormt

Viking fotballklubb annonserte fredag at dei forsterkar satsinga på kvinnelaget. Det gjer dei ved å for fyrste gong tilsetja assistenttrenar for A-laget i full stilling. Valet fall på Johnny Furdal.

«Eit nytt og viktig steg på vegen mot toppen», skriv Viking på si heimeside.

– Eg gler meg stort til å vera med på denne reisa som Viking er byrja på. Det triggar meg enormt å få vera med og byggja opp noko her i Viking, seier Johnny Furdal i artikkelen.

Han vert omtalt som ein tidlegare mørkeblå helt, med rette. Midtbaneeleganten vart heilt sentral i at Viking rykka tilbake til Eliteserien, og ikkje minst spelte omvikdelingen frå start då Viking vann cupfinalen mot FK Haugesund i 2019.

Furdal har signert ein toårskontrakt som assistenttrenar for damelaget, og blir dermed ein del av Magnus Meling sitt trenarteam. A-laget til Viking rykka i fjor opp frå 2. divisjon, og vart i år nummer fire på nivå 2.

– Det er blitt gjort ein veldig god jobb her frå før, og det blir kjekt å koma i gang og bli kjent med alle i trenarapparatet og alle spelarane. Så har eg litt kjennskap til laget etter å ha sett ein del kamper, men eg gler meg veldig til å kunna bidra og forhåpentlegvis vera med og syta for at Viking tar endå fleire steg, seier Furdal.

– Då Magnus kom inn og spurde om eg hadde lyst til å vera med, var det ei ganske enkel avgjersle, legg han til.

Får augo opp

Furdal håpar å kunna vera med og heva kvaliteten rundt laget, mellom anna ved å bruka eiga erfaring som Viking-spelar.

– Eg har gått vegen mange ynskjer og har nådd toppen. Det håpar eg å kunne bidra med inn mot spelarane. Eg veit også ein del om kva som krevst for å lukkast, opplyser Johnny Furdal i artikkelen.

38-åringen har dei siste fire åra vore trenar for Viking sitt G15-lag. No ser han fram til nye utfordringar i ein klubb og by som satsar meir og meir på kvinnelaget.

– Eg har sett veldig mange kamper av laget. Det er eit lag som har teke fine steg dei siste åra. I år har dei teke endå eit steg samanlikna med i fjor, og eg merkar at fleire og fleire får augo opp for det som skjer her. Det er mange organisasjonar i Stavanger som har fått augo opp for kvinnesatsinga, og det er veldig kjekt å sjå alle samarbeidspartnarane som ynskjer å vera med på å styrka satsinga, fortel Furdal.

Mørkeblått hjarte

Sportssjef Christer Corneliussen har litt av ein attest å gje til Johnny Furdal.

– Det er enormt kjekt å kunne ynska Johnny velkommen til vår satsing. Han kjem til å bli ein kjemperessurs for oss med si erfaring både som spelar og trenar, i tillegg til sin kunnskap og kvalitetar. Så er det sjølvsagt veldig kjekt at han har eit mørkeblått hjarte som bankar ekstra sterkt for Viking, seier Corneliussen.

Dermed markerer Kvinnherad seg endå sterkare på leiar- og trenarsida i norsk fotball. Dei siste månadane har som kjent Lars Johan Myklebust blitt tilsett som sportssjef for Brann sitt damelag, medan Endre Eide snart overtek som hovudtrenar for Egersund sitt herrelag i Obosligaen.