Fullt hus på ståande – avanserte i IBU-cupen

– Eg hadde før start som målsetjing å vera offensiv, og det føler eg verkeleg at eg var i dag. Eg fekk betalt for at eg var det utover i løpet. Det var litt stang ut på liggjande, kor eg måtte tåla tre strafferundar. Men eg henta meg bra inn igjen. Litt synd at eg var uheldig med skia i dag. Dersom eg hadde treft med ski og struktur, hadde det nok blitt ei betydeleg betre plassering, sa Ragnhild etter at ho hadde blitt nummer elleve i Sverige.

Hatlestrand-jenta legg ikkje skjul på at det er godt å vera tilbake i det internasjonale selskap. Det er der ho aller helst vil konkurrera. Den eldste av Femsteinevik-søstrene har eit mål om å gjera det så bra at ho det blir fleire renn i IBU-cupen og aller helst verdscupen etter kvart. Det handlar for hennar vedkomande mest om å finna roen på standplass. Få overført dei gode opplevingane på trening til renn. Farten i sporet er meir enn bra nok.

Fortare enn dei fleste

Det beviste også Ragnhild Femsteinevik da ho var med og kjempa om vinterens fyrste topplassering internasjonalt. Det var ein stor strek i rekninga at tre av dei fem fyrste skota hamna utanfor blinken. Men skytinga var ikkje så dårleg som det kan høyrast ut som. Eit par av skota var såkalla «kant ut», som det heiter i skiskyttarterminologien. Det vil seia at skota like gjerne kunne ha gått i blinken som utanfor.

– Korleis var det å få anvist tre strafferundar allereie på fyrste skyting?

– Eg hadde helst sett at fleire av skota sat der dei skulle. Men eg var som sagt veldig bestemt på at eg skulle vera offensiv. Derfor var det berre å fortsetja. Det vart ikkje enklare av at eg hadde bomma på skivalet. Men eg følte meg pigg fysisk, og fekk ein etterlengta opptur på ståandeserien. Det var ei utruleg god kjensle å sjå at alle blinkane falt, sa in letta Ragnhild.

Eit høgare toppnivå

Det at Ragnhild Femsteinevik blir nummer elleve i IBU-cupen med tre bom på ein sprint og har betydeleg dårlegare ski enn flesteparten av dei hardaste konkurrentane, er eit bevis på at ho har tatt steg og har eit høgare toppnivå enn nokon gong. Den hardtsatsande skiskyttaren tar med seg mykje positivt frå sprinten i nabolandet. Det halvanna minuttet som skilte ho og den sigrande Ida Lien, som er på landslaget, er det fullt mogleg å gjera noko med. Spesielt med tanke på at Lien skaut fullt hus, og har vore med og vunne verdscupstafettar og har delteke både i VM og OL.