Friidrettsfest for knøttsmå og større

100 meter kan vera langt når du er to-tre år, men då er det trygt å godt å vita at du kan halda nokon i handa gjennom kvar einaste av metrane – om du trong det. Etterpå vanka det medalje til alle dei 28 som gjorde unna knøtteløpet, tilrettelagt for dei opp til fem år.

– Den smakte særleg godt for knøtta som fekk sin første til premiehylla etter flott innsats på 100-meteren, melder friidrettsleiar i Trio Are Ulseth.

Han veit nok kva han snakkar om der, for han følgde to barnebarn gjennom halvanna løp. Han såg med sjølvsyn kva det betydde for dei minste å få medalje, ettersom han var den som delte dei ut også.

Persa i stavsprang

I sum var det 85 deltakarar, fordelte på det det Ulseth omtalte som «ein heil haug med øvingar». Sleggekast, kulestøt, liten ball, lengde, høgde, stavhopp, 60 meter, 100 meter, 200 meter hekk og 600 meter var på programmet.

I klassar frå 11 år og eldre vart det delt ut gull, sølv og bronse for prestasjonane, medan alle frå 10 år og yngre fekk deltakarmedalje.

Blant dei eldste denne dagen var Sander Sæverud Jensen. Trio-guten deltok i fleire øvingar, men var den einaste i meisterskapen som deltok i stavsprang, og gjorde det parallelt med knøtteløpet. 2,70 meter blei det teljande resultatet.

– Det er ny personleg rekord. Eg har hatt 2,80 på trening, men dette er det høgaste i stemne, og då altså gjeldande pers. Så eg er nøgd, sa 15-åringen etter eit riv på nettopp 2,80.

Den aktive tenåringen spelar fotball tre i veka, i tillegg til friidrettstreninga to gonger i veka.

– Det blir litt lite stavtrening. Ein ting er at det er to gonger i veka, men det er ikkje alltid at det er vêr til å trena på stav. Det kan ikkje vera for vått, forklarte han.

For full resultatliste, sjå torsdagsavisa til Grenda, enten i papir eller som e-avis.