Første sprett på langrenn

I strålande vintervêr, med framifrå forhold på skistadion, kunne Kvinnherad-karusellen endeleg byrja å snurra i Fjellhaugen. For somme vart det også aller første spretten på skirenn. Ingrid Aggvin (6) var ei av dei, og ho gjekk sitt første løp nokon gong under barneskirennet søndag.

– Det var fint, sa ho sjølv på smålåtent vis etter at medaljen for fullført løp var hengt om halsen hennar.

Saman med brørne Lars (9) og Nils (11), mamma Johanna og pappa Terje hadde Ingrid reist frå Varaldsøy på morgonkvisten for å få med seg høvesvis barnerennet og karusellrennet.

– Pappa gjekk med meg gjennom heile løypa. Han er flink til å gå på ski, vurderte Ingrid.

For Terje baud løpet på eit gjensyn med ein stad han sist vitja med ski på beina i eit anna årtusen.

– Eg trur ikkje eg har vore her på ski sidan eg gjekk eit kretsrenn her for om lag 30 år sidan, men me ville nytta høvet når det passa såpass godt som i dag, smilte mjølkebonden frå Varaldsøy.

Karusellrenn

Då barneskirennet var over, kunne Tobias Skåla Hansen få æra av å vera først ut i løypa av deltakarane i karusellrennet. I alt 36 langrennsløparar i alderen 8 til 68 stilte til start. Tobias og dei andre i åtte-, ni- og tiårsklassane gjekk 1,3 km, medan 11- og 12-åringane gjorde unna 2 km. 13- og 14-årsklassane tok 3 km-løypa, medan kvinner junior og senior gjekk 5 km. Herre senior, der Håvard Pedersen (Ternen) var 15 sekund raskare enn Isak Solli Søllesvik, gjekk 10 km.

Omvikdalen IL hadde ei stødig hand om arrangementet, og sytte for at både løparar, trenarar og smørjetam hadde det gode undervegs.