Fekk det tøft mot Smørås

Trio har fått ein brutal start på årets 4. divisjon. Trenaren lovar hard jobbing for å snu det.

– No ser det ut som at det er ein veldig jamn avdeling, og me er blant dei svakaste, men trener me godt og kjem oss opp eit par knepp, så er det råd å kjempa om poenga, seier trenar Øystein Ersland etter at turen til Smørås enda med 5-1-tap.

– Me ser veldig bra ut i starten av kampen, står godt defensivt og startar å skapa sjansar på overgangar, men blir råka av ein personleg feil som gir dei 1-0 etter 18. minutt. 2-0 kjem etter ein corner, som me no har sleppt inn mål på i alle kampane til no, forklarer Ersland.

Han mangla eit knippe av sine faste karar, og måtte mønstra svært ungt på keeperplass og i forsvar, der 16- og 17-åringar måtte ta seg av det som kom.

– Det var ungt no, men me har litt i bakhand. Dei klarer seg bra, trass i to personlege feil. Dette er eit langt løp. Pr. no er me svakast, men skal ikkje vera det når sesongen er over. Her må det jobbast på trening, det er det einaste som nyttar, sluttar Ersland.