Feira med gullmedalje

Trio var storfavorittar i oppgjeret mot Kvernbit på laurdag, og innfridde. Etterpå vanka det fortente gullmedaljar til puljevinnarane.

Med siger over Kvenbit ville Trio vera klare som vinnarar av si avdeling i 2. divisjon. Allereie frå første serve var det ikkje tvil om kor sigeren skulle hamna. Etter at 3-0 var eit faktum fekk jentene overrekt gullmedaljar av Kvernbit-kapteinen.

Trenar Robert Haugland var opptatt av noko anna enn resultatet etter kampen.

– Det er kjekt å sjå U17-jentene bli integrerte. Når me manglar nokon av seniorane, så er det kjekt at andre står fram. Me er jamne, og det har me vore heile året, vurderte Haugland.

 

Hesja ballen tilbake

Første settet var ikkje det beste publikum har sett i Husneshallen denne sesongen, korkje av Trio eller motstandaren, men heimelaget hadde full kontroll heile vegen og landa til slutt på 25-16. Det resulterte i spontan applaus frå publikum då laga gjekk til pause. Spesielt unge Amalie Ynnesdal plukka mange poeng frå sin midtposisjon.

Trio var det openbert beste laget, men vart av og til overraska av ein motstandar som spelte monaleg mindre spel enn det ein er vane med. Der Trio bygde opp angrepa sine på vanleg måte, hendte det at Kvernbit berre hesja ballen tilbake over nettet ved første høve. Trio vann andre settet 25-15.

Då dei starta på tredje settet var lufta gått ut av Kvernbit. Katarina Kucerkova viste smartness og fin teknikk ved fleire høve i starten av settet, medan Renate Engelsen serva inn ti strake poeng midt i settet. Det enda 25-6, noko som seier det meste om styrkeforholdet laga i mellom.

 

Uvisst om opprykk

Etter kampen var trenaren godt nøgd med at jentene klarte å halda fokuset på å kosa seg utpå banen.

– Blir det kvalikspel til 1. divisjon no?

– Det er det fleire som må få meina noko om. Det er mange omsyn å ta, og jentene må få seia sitt. Men på ståande fot trur eg ikkje på avansement. Det kostar mykje, både av jentene, trenarapparat og pengar å delta i ein landsomfattande divisjon.

– Blir det feiring i kveld?

– Det er ikkje planlagt noko, men eg høyrer jentene mumla om noko no etter kampen. Me skal i alle fall kosa oss med avdelingssigeren, slutta Haugland.