Få kampar, men flest mål: – Veldig gøy å føla seg god

Berre ni kampar har Anders Næs lagt bak seg for Rosendal denne sesongen. Likevel tronar han øvst på toppscorarlista, med eit byks ned til 2. plassen. Heile 16 registrerte nettkjenningar blei det for Næs i Rosendalstrøya, men faktisk to til om ein tar med måla han hadde mot Vadmyra 4, som av ulike grunnar ikkje har kome med i oversikta.

Dermed kan han skilta med eit målsnitt på heile to.

Ikkje kjedeleg

Denne sesongen har Rosendal sitt herrelag spelt i 7. divisjon. For nokon som har 19 U-landskampar og 42 kampar i 1. divisjon for Løv-Ham i sekken, er det kanskje å forventa at ein briljerer litt.

– Det er veldig gøy å føla seg god. I all audmjuka så føler ein seg som ein av dei betre i 7. divisjon med den bakgrunnen eg har, fortel han.

– Du er ikkje redd for å kjeda deg då?

– Absolutt ikkje! For meg handlar det om så mykje meir enn berre scoringar. Fotball skal vera gøy, og det strekk seg utover banen. Det er utruleg givande å få vera med på å dela visdom og erfaring med dei yngre spelarane som har kome til klubben sidan sist eg var med, svarar Næs, som også kan fortelja at det har vore eit generasjonsskifte i klubben.

– Nokre av dei nye lagkameratane mine var ikkje fødd ein gong då eg var her sist, det set ting litt i perspektiv, seier toppscoraren.

Renessanse

Sjølv om Næs no spelar for moderklubben, har han framleis adresse i Bergen. Med lang reiseveg og småbarnsliv, har det derfor ikkje blitt meir enn ni kampar denne sesongen.

– Men laget klarar seg godt utan meg òg, så dei er på ingen måte avhengig av at eg skal vera med, seier han.

Næs har eit håp om at Rosendal-fotballen skal få si renessanse.

– Fotballgruppa har lege nede med broten rygg nokre år no, og eg vil at fotball skal bli kult igjen. At det skal vera kult å både spela og sjå på kampar. Eg hugsar godt då heimekampane var ei happening som samla folk i Rosendal laurdag føremiddagane. Det hadde vore stas om vi hadde klart å fått til det igjen.

Stort bykst

Det er Martin Lygre på Trio som kjem som nummer to på scoringslista denne sesongen, med i alt ni mål fordelt på 22 kampar.