Endå ein kamp avlyst: – Demotiverande og frustrerande

Laurdag skulle Rosendal sitt damelag spelt mot Smørås 2 på heimebane. Men kvelden før kom telefonen om at gjestene ikkje kunne stilla.

– Dei har ikkje nok spelarar, seier dei. Dei påstod at dei hadde 15 spelarar på torsdag, men at dei seinare hadde fått nokre forfall, opplyser Rosendal-trenar Håvard Sætrevik.

Då terminlista kom i vår, stod 5. divisjon avdeling B oppført med 14 lag. Sidan det berre er éin kamp mot kvar motstandar, skulle Rosendal få sju heimekampar og seks borte. Fasiten vart berre tre kampar på eige gras. Allereie før seriestart trekte eit lag seg frå heile sesongen. Då hausten skulle starta, trekte endå eit lag seg. I tillegg har både Ørnar og no Smørås 2 lete vera å ta turen til Rosendal.

– I teorien kan vi gjera eit nytt forsøk på å få spela kampen mot Smørås, men eg trur ikkje veldig på at det vil skje, seier Sætrevik.

Får konsekvensar

Rosendalsdamene har også mista ein bortekamp. Os 2/Nore Neset skulle arrangera ein cup, og greidde ikkje å finna ledig bane. Viss ikkje dette oppgjeret blir spelt seinare, er faktisk sesongen no over for Rosendal, etter berre åtte spelte kampar. Alle avlysingane slit på humøret til både spelarar og støtteapparat.

– Det er demotiverande og frustrerande. Både spelarar, lagleiarar og andre held seg til terminlista og legg opp planar etter den. Folk byter jobbvakter eller seier frå seg oppdrag fordi dei skal spela kamp, så avlysingane får jo konsekvensar, seier Håvard Sætrevik.

– Vi veit vi må ta ferje for å koma oss på bortekampane, så det viser seg at det går an, legg han lettare sarkastisk til.

18 poeng

Ei trøyst er at ein del av spelarane også er aktive på J19-laget, som kjempar om krinsmeisterskapen. Heldigvis får dei eit godt kamptilbod der.

Damelaget står per no med åtte spelte kampar, éin walk over-siger og 18 poeng. Det gjev 4. plass på tabellen, slik at det vert korkje opp- eller nedrykk.