Emilie hevda seg i Hovedlandsrennet

Omvikdalen-løparen som fyller 16 år dette kalenderåret, gjorde ein god figur både i det individuelle rennet og kretsstafetten. Emilie var eit par veker før den uoffisielle norgesmeisterskapen for 15 og 16-åringar, veldig usikker på formen. For i starten på vinteren blei ho sjuk. Det gjekk nesten fem veker før ho var klar for å yta sitt beste på trening og i renn. Enes-Seberg rakk heldigvis å koma i form til Hovedlandsrennet, som var vinterens store mål.

– Det hadde vore kjedeleg dersom eg ikkje fekk med meg det. For eg var heime med korona under Hovedlandsrennet i fjor. Eg hadde forhåpningar om at det skulle vera mogeleg å få til bra prestasjonar i Meråker. Eg føler at eg lukkast med det, sa Emilie som er den nest eldste av fire ivrige langrennsløparar i familien.

Emilie har tenkt å halda fram satsinga når ho snart blir gammal nok til å konkurrera i juniorklassen. Det er for øvrig noko ho ser frem til.

Får gå fleire viktige renn

– Eg gleder meg til at det blir fleire viktige rennhelger. Komande vinter blir det både junior-NM og norgescup. Dermed får eg sjansen til å konkurrera med dei beste fleire gongar, sa Emilie til Grenda i etterkant av massemønstringa.

Hun gjekk til ein 34.plass i distanserennet i dei norsk-svenske grensetraktene. Det i ein klasse kor det var nesten 150 startande. Det mest gledelege og oppløftande var at det ikkje var lengre opp til topp 10- og topp 20-plassering enn det var. Emilie følgde opp den gode individuelle prestasjonen med å gå ein god stafettetappe for andrelaget til Hordaland i kretsstafetten. Der blei det 25. plass i ein fartsfylt stafett som samla mange lag frå heile ski-Norge.

Meistrar begge stilartane

Emilie Enes-Seberg har jamt over gjort sine beste renn i skøyting i vinter. I Hovedlandsrennet som er det største og viktigaste arrangementet for denne aldersgruppa, gjorde Emilie sine saker veldig bra i klassisk. Tenåringsjenta fekk dokumentert at ho meistrar begge stilartane. Det er viktig i forhold til å halda fram den fine utviklinga som ho har hatt i vinter.

– Eg føler at eg har utvikla meg som langrennsløpar i vinter. Eg går ein god del fortare no enn eg gjorde på same tidspunkt i fjor, sa hun som skal gå nokre renn til før ho set vekk skiene og tar ein liten konkurransepause.