Eline satsar på handballen
Ho kastar hardare enn vaksne mannfolk. Eline Bjørke-Ljostveit frå Herøysundet har lyst å bli god i handball.
Publisert
På laurdag skipa Kvinnherad handballklubb (KHK) til Handballens dag i Husneshallen. Der var 1. klassingane inviterte til å prøva idretten.
– Vi har relativt god aktivitet, men vi ynskjer å rekruttera fleire og få flest mogleg med på laget. I dag var det 13 fyrsteklassingar med, i tillegg til at det var nokon det ikkje passa for, opplyste styreleiar Daniel Haugland.
Annonse
KHK deltok også på Fritidsmessa. Der hadde dei sett opp eit handballmål med fartsmålar bakom, slik at folk kunne testa ut kor hardt dei kasta. Då Grenda stakk innom, leia Eline Bjørke-Ljostveit med eit kast på 76 kilometer i timen.
– Ho leiar føre Øystein Eikeland, som er ein vaksen mann. Det er godt gjort, smilte Daniel.
Ny rekord
Eline spelar på J13-laget til KHK, og legg ikkje skjul på at ho vil prøva å bli god.
Annonse
– Ja, eg satsar litt på handballen, sa ho.
– Kor mykje trenar du?
– Eg trenar to gonger i veka, og så er eg hjelpetrenar for eit lag.
– Har du eit idol innan handballen?
– Du meiner nokon eg ser opp til? Det må bli kapteinen på landslaget, Stine Oftedal, vurderte Eline.
Grenda måtte sjølvsagt fotografera Eline i aksjon. Fyrste gongen kasta ho litt over 60 km/t, men heldigvis var bileta litt uklare, så ho måtte prøva på nytt. Då slo ho like godt til med ny rekord, heile 77 km/t.
Annonse
– Det er eg veldig nøgd med, smilte talentet.
