Eksperten sine tips: – Sjå opp for Leif og Arne

Premier League sparkar i gang ein ny sesong fredag 16. august. Då startar også den sjette utgåva av Grendaligaen. Når du skal planleggja laget ditt, må du ifølgje fjorårsvinnaren ha to karar med norskklingande namn i tankane.

I mai vart Håvard Sætrevik frå Rosendal den femte vinnaren av Grendaligaen, etter Håkon Haga, Øyvind Bjørnevik, Even Hansen Skåla og Bernt Bjørsvik. Ny sesong startar 16. august med Manchester United heime mot Fulham. No er det med andre på tide å snikra saman laget ditt, og her får du nokre gode råd frå mannen som triumferte i fjor.

– Det er ein haug med potensielt irriterande og spennande sider ved årets sesong. Den eine delen handlar om pengar. No har vi tidenes dyraste spelar i Haaland, som kostar 15 millionar. Men kven tør å starta utan han? Viss du vil ha Haaland på laget ditt, må du vera budd på å gjera offer. Og vil du gå for Salah i tillegg, må du jobba for å balansera budsjettet. Men kven tør å starta utan Salah?, analyserer Håvard Sætrevik.

I tillegg til dei to nemnde storscorarane, er det endå nokon til som mange managerar drøymer om.

– Du har dei litt rimelegare spelarane som leverte gode prestasjonar i fjor, til dømes Palmer, Saka og Foden. Korleis skal vi angripa den delen? Det blir i beste fall krevjande å få plass til tre av desse fem. I tillegg blir det spennande å setja saman spisstrioen, seier Sætrevik.

Dyre-dyre spelarar

Når vi snakkar med Fantasyeksperten halvanna veke før sesongstart, har han allereie jobba med laget sitt ei god stund.

– Eg har kome eit stykke på veg, men føler ikkje eg er i mål. Det ser ut til at eg landar på både Haaland og Salah. Derimot er eg ikkje sikker på om eg bør ta med Trent i forsvar, som er ein av dei andre dyre-dyre spelarane. Det finst eit aspekt som eg ikkje er sikker på korleis vil slå ut, og det heiter EM. Korleis har det påverka sesongoppkøyringa og formen til dei som haldt på lengst?, filosoferer Håvard Sætrevik.

Kvar sesong dukkar det opp spelarar som få har tenkt på, men som leverer poeng på rekke og rad. Sætrevik har i så måte kanskje eit ess i ermet.

– Leif Davis på Ipswich. Han er noko så knakande tøft som ein venstreback på eit nyopprykka lag og heiter Leif. Han ausa inn med målgjevande pasningar i fjor. Ipswich startar hardt med Liverpool heime og deretter City borte, men etterpå er det grønt ljos i dei 7-8 neste kampane, avslører Sætrevik.

– Eg veit ikkje om eg tør gå for han, men eg er freista, mest fordi eg kjenner nokre Ipswich-supporterar på Stord, legg han til.

Ikkje kvitt City

Sjølv om det ikkje er like viktig som å vinna Grendaligaen, betyr det jo litt kven som toppar Premier League også. Her trur ikkje Håvard Sætrevik på dei store overraskingane.

– Det er ingen grunn til å tru at vi blir kvitt City med det fyrste. Og alt tyder på at Arsenal har rekruttert fornuftig. Liverpool blir spennande. Når dei har fått ein manager som heiter Arne, er eg usikker på kva vi kan forventa. Liverpool har enno ikkje handla i sommar, men om dei har behov for å gjera noko er oppe til diskusjon, seier han.

Manchester United-supporteren har ikkje veldig store forventningar til eige lag.

– Det er lite som tyder på at vi treng rydda plass til Manchester United i Champions League. Skadeproblematikken som rei forsvaret i fjor, ser ut til å ha flytta seg fram til midtbanen. Elles trur eg Aston Villa får rikeleg nok med Champions League, og kan enda med å ta eit steg bakover, slik Newcastle gjorde førre sesong. Chelsea byggjer nytt lag igjen og har ny manager igjen, medan Tottenham kjem til å ha los på 4. plassen i år også, men ikkje klara det, vurderer Sætrevik.

– Eg fryktar City vinn igjen, avsluttar han.

Har du delteke i Grendaligaen tidlegare, så kjem du automatisk med når du klargjer laget til årets sesong. Er du ny i gamet, finn du Grendaligaen med kode z0c4cj.