Eivind Larsen satsar meir på skytinga igjen, og det byrjar å gje resultat. Til venstre står stemneleiar Arvid Tufta.

Morten Nygård

Eivind tok bronsen i samlagsstemnet

Etter mange år utan satsing, har Eivind Larsen igjen ambisjonar som skyttar. I helga vart han nummer tre i samlagsstemnet på Midthølen.

Morten Nygård Journalist

Publisert 21.03.2024 - 17:30

Sunnhordland skyttarsamlag sitt samlagsstemne i felt vart skipa til laurdag og søndag. Arrangør var Kvinnherad skyttarlag. I Midthølen var det forbausande gode tilhøve, og snøen hadde i stor grad forsvunne frå området.

– Ikkje verst vêr å skyta ute i dette. Vi kan ikkje klaga, smilte leiar i stemneutvalet, Arvid Tufta, då Grenda kom på besøk søndag føremiddag.

Annonse

I alt var det 66 deltakarar. Kring 15 av dei representerte Kvinnherad skyttarlag. I tillegg stilte nokre frå Hatlestrand og Ølve skyttarlag og frå Husnes skyttarlag. Tufta var tydeleg på kven av dei lokale som hadde utmerka seg på dåverande tidspunkt.

– Vi har allereie ein frå Kvinnherad skyttarlag som leiar. Eivind Larsen fekk 30 treff på grovfelten. Han har med seg heile familien. Dei er svært interesserte og skyt godt, alle saman. I tillegg har Dagfinn Mehl 29 treff. Så dei ligg godt an. Det blir finale seinare i dag, opplyste Arvid Tufta.

Per Håkon Korsvold frå Uskedalen hadde god hjelp av pappa Per på standplass.

Ikkje tenka for mykje

Inne i huset på Midthølen hadde folk benka seg føre skjermane for å følgja skytinga fortløpande. Det var også travelt i kiosken og på datarommet. Terje Hus smilte frå øyra til øyra då han hasta forbi.

Annonse

– Synd du ikkje kom tidlegare i dag. Då skaut eg stuparen på 7,33 utanfor konkurranse, flirte han. Hadde han levert same prestasjonen i konkurranse, så hadde det blitt soleklart gull.

Arnt Orholm hadde full kontroll på finfelten.

Men eigentleg jakta Grenda på dei to som låg godt an i samandraget. Straks etter dukka Dagfinn Mehl opp, sikkert på veg for å oppdatera listene.

– Nøgd med skytinga?

– Ja, det er eg jo.

– Hadde du venta å vera med i toppen?

– Nei, ikkje i det heile. Eg skyt nesten ikkje lenger, berre ein og annan gong.

Annonse

– Kva blir oppladinga fram mot finalen?

– Nei, det blir å sitja her inne og passa på dei andre. Men kanskje det er det som skal til – å ikkje tenka for mykje på det, analyserte han.

Dagfinn Mehl låg godt han etter innleiande skyting.

Skyttarfamilie

Eivind Larsen fann vi på ein bakketopp, der han var utkommandert som standplassleiar. Også han var svært tilfreds med resultatet sitt.

– Det er mange år sidan eg var med som aktiv skyttar, det er vel ti år sidan sist. Men eg har trena mykje inne i vinter, opplyste han.

– Betyr det at du satsar igjen?

Annonse

– Ja, lova han, og annonserte at planen er å delta på Landsskyttarstemnet.

Som nemnt hadde 47-åringen frå Husnes med seg både sambuar og to ungar til Midthølen.

– Vi er ein skyttarfamilie. Jentungen skaut veldig godt i går, og det var fyrst gong ho deltok i skyting utandørs. Faren var veldig nøgd, smilte han.

Arvid Tufta og Eivind Larsen passar på at skyttarane følgjer prosedyrane på standplass.

Etter finaleskytinga var det Jon Terje Hauger frå Stord som stakk av med gullet på grovfelten. Han noterte 42 treff, deriblant 8 innertreff. Det var også hans andre napp i vandrepokalen. Eivind Larsen vart nummer tre med 41/5, medan Dagfinn Mehl enda på 6. plass med 38/3.