Digitalt landsskyttarstemne i år også: – Det er ei fattig erstatning

– I år som i fjor vart det ikkje landsskyttarstemne. Dei fleste skyttarlag arrangerer difor Heime-LS, slik at det blir eit arrangement. Men det er ikkje premiering for beste skyttar, og så vidare, fordi det er for ulike banar rundt om. Me har til dømes ein veldig vanskeleg bane på 100 og 200 meter her oppe i Midthølen, til det er han for utsett for vind, forklarer Terje Hus i Kvinnherad Skyttarlag.

Sosialt

Hus kunne sjå 26 skyttarar finna vegen til standplass denne kvelden, og at dei også fekk kosa seg i ei sosial ramme.

– Grilling og vaflar er obligatorisk på skytestemne. Det er kjekt å få samla folk etter gamalt, meiner han.

Av skyttarane som var i sving, var det nevøen hans Andreas Hus Hansen som presterte best.

– 348 av 350 poeng er ganske bra. I hans klasse ville det vore 8. plass i nasjonal samanheng for junior (16-17 år). Der er det seks jenter før han som har 350. Det er ein utruleg sterk klasse der, kommenterer Hus.

Godt nøgde

Grenda stakk kameralinsa innom standplass då skyttarane i klassane 1 til 5 skulle gjera opp sitt mellomverande. Arvid Tufta var stemneansvarleg, og styrte skyttarane med ei stø, om enn operert han.

– Eg kan difor ikkje vera med og skyta sjølv i år, men eg skal tilbake på standplass, lover veteranskyttaren.

Frode Markhus, som skyt i klasse 4, var høveleg godt nøgd med sine 337.

– Eg var litt uheldig med vinden på kneskytinga, men elles var dette bra. Eg skrudde ein halv runde etter kneserien, og det var med på å henta meg inn. Ståande var grei, men eg hadde ein sjuar. Eg har ikkje skote så mykje i år, så dette var bra, tykkjer han sjølv.

At dette ikkje er det same som å reisa på landsskyttarstemnet, det er dei alle skjønt einige om.

– Det er ikkje halvparten så kjekt ein gong, konkluderer Dagfinn Mehl, til bifallande nikk hos dei rundt seg.

– Det er ei fattig erstatning. Landsskyttarstemnet er ei veke me ser fram til, meiner Mehl.

Mehl var forresten i det rause hjørnet denne dagen, og han gav Maxi Zimmermann på naboskiva eit av sine skot, slik at Zimmermann stod med 11 skot på si skive, medan Mehl berre fekk 9 skot teljande hos seg.

– Når dette skjer, får ein velja kva skot ein tar vekk, forklarer Zimmermann.

– Du fekk ein tiar, ja. Det var som pokker, skjemtar Mehl.

– Det veit du ikkje, krangla Maxi, som sjølvsagt ville ha æra for alle sine tiarar sjølv.

Familiekonkurranse

På skive 7 og 8 var det duka for familiekonkurransen mellom far og son Fossberg. Den gjekk i feil favør, om me skal tru pappa Jens Åge.

– Det er sjeldnare og sjeldnare det går i rett favør, vedgår han, medan unge Jens Petter gliser breitt i skjegget på naboskiva.

– Det er ikkje slik det skal vera, legg han til.

– 333 mot 316 er på sett og vis utklassing på 35 skot, om Jens Petter skal få seia kva han meiner om differansen.

Onsdag var det feltskyting på Handeland, med fleire gode resultat fordelt på dei 17 deltakarane. Leif Skeie skaut 30 treff på 30 skot for første gong, og også Arnt Orholm, Andreas Hus Hansen og Jarle Bruntveit klokka inn 30 treff.