– Dette var forferdeleg surt

Det var orda til Halsnøy-trenar Kjell Henning Berntsen etter at laget hans spelte 2-2 heime mot tabellnabo Lyngbø 2 søndag ettermiddag.

Og at Berntsen synest det var surt, er ikkje vanskeleg å forstå. For i 75 av 90 minutt var det stort sett berre eitt lag det handla om på Nya Myro. Heimelaget styrte spelet fullstendig og stod for det som var av sjansar. Men eit varig sjansesløseri og ei to minuttar lang overtenning frå spydspiss Mats Paulsen, sørgja for at dei grønkledde gjestane kom tilbake i kampen. Det etter å ha låge under med to.

For då Stian Jokerud auka til 2-0 midtvegs i fyrste omgang, fem minutt etter at Kjell Arne Berntsen hadde sklidd inn 1-0, var det utifrå kampbilete heilt utenkjeleg at Lyngbø skulle kjempa seg tilbake i kampen. Men det gjorde dei.

Fyrst etter sløvt Halsnøy-press minuttet før sidebyte. Og så heilt på tampen av andre omgang.

– Dette var forferdeleg surt. Sjeldan har eg vore med på at vi har skapt så mange sjansar, men likevel ikkje går sigrande av banen. Så dette følast ikkje som noko anna enn eit tap, seier Kjell Henning Berntsen.

Noko av skulda for det må Mats Paulsen ta på seg. Spydspissen måtte ta tidleg dusj etter at han i løpet av eitt fattig minutt var for seint inne i to duellar.

– Det er det raude kortet er avgjerande for resultatet. Men det skal seiast at vi er spelemessigt heilt overlegne fram til då, og burde fint ha avgjort kampen lenge før utvisinga. Det er veldig surt, og kan fort visa seg å vera heilt avgjerande i nedrykkskampen, seier Berntsen.