– Dette er ein av dei mest spennande jobbane i fotball-Norge

Torsdag kalla Brann inn til pressekonferanse for å presentera sin nye sportsdirektør for kvinnedelen av klubben. Eit massivt presseoppbod møtte opp på stadion for å stadfesta det rykta hadde fortalt tidlegare på dagen; uskedelingen Lars Johan Myklebust blir ny sportssjef for Brann-damene.

Dagen etter han vart presentert som sportsleg leiar for Brann-damene, klarnar Lars Johan Myklebust knollen heime i stova til mor og far i Uskedalen.

– Det var ein ganske intens dag, kommenterer 43-åringen.

– Spennande jobb

I august stod brann brått utan sportssjef for damelaget, etter at Aleksander Olsen forlét jobben til fordel for assistenttrenarjobb hos rivalen Vålerenga.

– Eg fekk spørsmål frå eit rekrutteringsbyrå for tre veker sidan om eg ville stå som kandidat til stillinga. Eg sa meg interessert, var på intervju førre torsdag, og fekk tilbod om jobben same dag. Då var det enkelt å takka ja, seier Myklebust, og legg til:

– Eg meiner oppriktig at det ein av dei mest spennande stillingane i norsk fotball.

Torsdagen viste litt om kva interesse som er kring Brann, både i Bergen og nasjonalt.

– Det var god å føla at ein blei tatt godt i mot i klubben. Sjølve pressekonferansen var ei ny oppleving, men det er veldig kjekt å sjå at det er ei så stor interesse rundt kvinnefotballen. Det er ein enorm vekst der, seier Myklebust til Grenda.

– Kor står kvinnefotballen i Brann?

– Brann er ein føregangsklubb i norsk fotball om ein ser på det å ta inn eit kvinnelag inn i det som tradisjonelt har vore ein herreklubb. Det er ingen andre klubbar som har gjort det på ein så god måte, spør du meg. Brann er enormt opptatt av at det er éin klubb, påpeikar Myklebust

Langsiktig perspektiv

Under pressekonferansen på Brann Stadion på torsdag, var dagleg leiar i Brann Christian Kalvenes open om at det hadde vore rundt 60 søkjarar på stillinga som har stått tok sidan august.

– Å ha denne stillinga i Brann og i Bergen, er noko av det største i landet, og kombinert med den veksten som er kvinnefotballen for tida, så får eg vera med på ei enorm reise, seier Myklebust.

I Europatoppen har han jobba mykje med å finna fram data og laga verktøy som skal hjelpa sportssjefane og dei utviklingsansvarlege i klubbane, altså nivået han sjølv skal jobba på no.

Brann tenkjer langsiktig og har eit uttalt ønske om stabilitet i sportssjefrolla. Der dei føregåande sportslege leiarane har hatt familien sin i høvesvis Oslo og Danmark, er det no eit krav at Myklebust flyttar med familien frå Stavanger til Bergen.

– Ser du for deg Lars Johan Myklebust i denne jobben om fem år?

– Definitivt. Det er ei stilling der du må ha eit langsiktig perspektiv om du skal få ut potensialet og vera med på reisa. Fem år er eit minimum her, seier han klart.

Etter fleire år der datamaskinen har vore ein viktigare arbeidsreiskap enn sjølve fotballen, ser Myklebust no fram til å leva med eit lag igjen.

– Eg gler meg til å følgja laget tett. Det gir ein heilt eigen energi, seier han.

Målet for klubben er å repetera kveldar som då dei tok i mot storklubbane Lyon og Barcelona i Champions League. Då må ein vera best i Norge, noko Brann jo har vore dei føregåande åra.

Kan takka Klopp

Om ein kastar ein stein i vatnet, kan ringane breia seg langt omkring. Slik er det stundom i fotballen også. Og skulda for at ein no har ein kvinnhersk sportssjef i Brann, kan ein med litt romsleg tolking leggja på Jürgen Klopp.

Etter den tyske trenarlegenda gav seg, og Liverpool henta Arne Slot frå nederlandske Feyenoord, vart Slot erstatta med trenar danske Brian Priske som trente Sparta Praha. Det tsjekkiske laget forfremja sin danske assistent, som i tur henta seg assistent frå IFK Gøteborg, som henta assistent frå Sarpsborg 08, som igjen erstatta sin assistent med Joachim Klæboe, som var assistenttrenar for Vålerenga sitt kvinnelag.

Om du har klart å hengja med heilt fram til dette, så klarer du løysinga også. For Vålerenga erstatta Klæboe med Aleksander Olsen. Han var sportssjef for Brann-damene. Altså jobben Myklebust startar i 1. november.

– Så har Klopp endeleg bidratt med noko fornuftig, gliser Myklebust heime i stova til mor.