Desse Ternen-jentene er krinsmeistrar

Ternen sine 13-årsjenter har ikkje tapt ein einaste seriekamp denne sesongen. Slike resultat vert det sjølvsagt seriegull av.

Ikledd lett gjenkjennelege rosa drakter, har Kjetil Heimvik og Håkon Askeland sine fotballspelarar skapt trøbbel for motstandarar på i og utanfor Kvinnherad denne sesongen. Det starta i sommar då dei gjorde sakene sine godt i Sandefjord.

– Vi vann B-sluttspelet på Sandarcup, faktisk. Det var veldig sterkt, seier Heimvik.

Dei er åtte jenter, som har spelt saman sidan dei var små, og som konkurrerer i sjuar-fotball. I serien har dei berre møtt lokal motstand i Uskedalen og Trio/Halsnøy. Det har resultert i fire sigrar og ein uavgjort.

– Vi har vore bra. Og vi har nokon jenter som er veldig gode når dei vil. Og om det startar litt slapt, har dei vist at dei har ein god evne til å henta seg inn igjen om dei kom skeivt ut. Det hjelper på, smiler trenaren.

Sånn det ser ut no, så er det også siste sesong i Ternen for 13-årsjentene. Med berre åtte spelarar, vert dei for få til å gå opp til ellevarfotball.

– Sjølv om både trenarar og spelarar helst har lyst å fortsetta i Ternen, så må vi nok søka asyl hjå Trio frå neste sesong, seier Kjetil.

Men før det skal ein god sesong feirast med ei skikkeleg avslutning.

– Vi har alltid skikkelege avslutningar, og det må vi sjølvsagt ha i år òg. Men det er ikkje sånn at vi avsluttar treningane, for vi har treningar heile året, seier Askeland.