Debuterer i handball-Norway Cup
Då Norway Cup starta opp att i 2022 etter pandemipausen, vart handball ein del av cuptilbodet. I år skal Kvinnherad Handballklubb av garde med tre lag.
Publisert
Sist oppdatert
– Det blir første gongen vår med handball på Norway Cup. Cupen ikkje så stor, i den forstand at det er få handballag med, med det blir cup, forklarer trenar Dagfinn Gjerde.
Kvinnherad Handballklubb-bataljonen blir truleg rundt 100 i hovudstaden, når ein reknar inn spelarar, trenarar, foreldre og supporterar.
Annonse
– Dette blir noko anna enn cupen me var på i Fredrikstad, som har mange fleire lag med, men der kampane er korte og går ute. I Norway Cup bruker ein hallar i tilknyting til Ekebergsletta, og det blir fulle kampar, seier trenaren.
KHK stiller med to lag i J15/16-klassen, og eitt i J20. Det eine laget får til og med eit brasiliansk lag å bryna seg på.
– Jentene gler seg veldig. Dei skal bu på hotell, og har vore superflinke med dugnad heile sesongen.Fredrikstad-cupen avslutta førre sesong, denne cupen blir ein slags sesongstartande. Me har ein treningsvillig gjeng, og dei har trent to gonger i veka for å halda form og engasjement oppe til cupen, seier Gjerde.
Handball-Norway Cup har ikkje slått ut i full blom enno, slik fotballvarianten har.
Annonse
– Me må sjå om dette er kjekt og om dette er noko me skal gjera vidare i framtida. Ein treng å få cupen fram i media, slik at dei store klubbane får det inn i sine vanar, vurderer Gjerde.
– Me håper på kjekk tur, gode prestasjonar og at me får det veldig kjekt sosialt, sluttar han.
