Christine er finaleklar

25-åringen frå Husnes er midtvegs i utdanninga til sin andre bachelorgrad, og er på femte året som student i hovudstaden. Dei fire første åra var det Oslostudentenes Idrettsforening (OSI) som fekk nyta godt av volleyballeigenskapane hennar, tre av åra i 1. divisjon.

– I sommar vart det mogelegheit til å koma uttakstrening med elitelaget til Koll. Eg prøvde meg, og kom med, smiler ho gjennom telefonen frå hovudstaden.

Førebudde

Sesongens NM, altså cupen, starta med godt med Kvinnherad-innslag på kvinnesida. Strand-Ulv slo ut BSI i første, men vart stoppa av TIF Viking med Tora Aksnes-Øystese på banen i åttandedelfinalen. TIF Viking snubla mot Randaberg i semifinalen i slutten av november, og det er altså sistnemnde lag som står på andre sida av volleyballnettet når Christine Skogseth Bjørsvik entrar cupfinalearenaen Ekeberghallen.

– Me byrja å førebu oss til finalen før jul. Det har vore videoanalyse og planlegging av trekk og mottrekk. No håper me å få ei god veke med trening før kampen, seier Christine.

Ho har spelt i kantrolla for Koll sidan ho meldte seg til teneste for dei.

– Eg har vore innom det meste av posisjonar før det. I OSI var eg mykje diagonal, som er ei reinare angrepsrolle enn kant. For Koll må eg bidra både offensivt og defensivt, forklarer ho.

Husnes-jenta spelte med Trio opp gjennom ungdommen, heilt til ho reiste til Oslo for å studera.

– Eg trente med Trio i jula. Det er kjekt at dei har fått fleire juniorlag i klubben også, i tillegg til damelaget, meiner ho.

Dobbel grad

No held ho på med sin andre bachelorgrad. Christine er midt i eit studie i anvendt datateknologi, og har allereie gjort unna ein grad som bioingeniør.

– Det er skule på dagen og volleyball på ettermiddagen, seier ho om kvardagen i det femte året som Oslo-student.

– Eg speler med ein kjekk gjeng, så det gjer ikkje noko at eg er mykje saman med dei. Med kampar så er det ofte 5-6 økter i veka, seier 25-åringen som hadde to sesongar i 1. div med Trio før turen gjekk austover.

– Å ta steget opp til Koll var stort nok, det er mange gode enkeltspelarar i laget, og mange med høgt nivå. Då er det kjekt å få ta dette steget. Me har gode trenarar og kjekt miljø, noko som har gjort det veldig enkelt å koma inn i laget, meiner Christine.

Laget har halvt om halvt med tilreisande studentar og det Bjørsvik litt humoristisk kallar lokale heltar.

– Det er ein god mix, stadfestar ho.

Går for gull

Ambisjonen til Koll og Christine er å vinna.

– Finalen går på TV2 sport1 og TV2 play. Eller i Ekeberghallen, viss du er i Oslo, reklamerer ho.

– Søster mi bur her, og kjem. Mamma og truleg pappa tar turen over fjellet, melder kantspelaren.

Søstera er Marion, som for tida er mest kjent under artistnamnet Woodseth til etternamn.

Christine har sysla med musikk før, spelt fiolin i 14 år og vore med i kor.

– Men eg har ikkje gjort noko slikt i Oslo. Eg lyttar på Marion, det er meir enn nok, meiner ho.

Mamma er Maren Skogseth, og Christine har spelt i Trio samtidig med som dei to var på banen.

– Og med pappa (Åge Bjørsvik, journ.merk) på trenarbenken. Familieføretak, smiler ho.

Steg opp

– Eg starta med volleyball på barneskulen, med mamma som trenar. Pappa blei trenaren då me gjekk på ungdomsskulen. Eg har vore heldig med mange gode trenarar i Trio-miljøet, som Robert Haugland, Eirik Sævareid, Åge Vik og Stian Petterson, skryt finalisten.

Eit langt liv i volleyballen har rusta Christine for kampen som ventar på laurdag. Eigenvurderinga hennar er at ho ikkje er den raskaste, men at ho les spelet godt og kompenserer mykje med det.

– Ein merkar steget opp i eliteserien på fleire måtar, som at eg var blant dei høgaste i laget mitt i OSI, men her er eg ikkje det. Me har fleire opp mot 1,90 i Koll, forklarer ho.

Hennar 178 cm over skosolen vurderer 25-åringen til å vera på snitthøgda i serien.

Ho snakkar fint om å prøva seg på eit høgare nivå.

– Det krev innsats og stå på-mot for å ta steget, men viss ein tør å satsa litt, så er det mange i Kvinnherad som kan nå opp, trur Christine får dagar før sin største kamp til no i karrieren.