Byter til satsingsklubb for kvinner

– Det er kviledag i dag, etter langkøyringar omtrent ei veke i strekk. Eg er i gang med oppkøyring til NM i Sandnes 22.-25. juni, fortel Ingeborg Hestad til Grenda.

Der kjem ho til å representera CK Victoria, ein trondheimsbasert klubb som er ein rein kvinneklubb, og som stadig vekk bit frå seg i kamp med dei norske profflaga.

Elitesatsing

– Det er ein større klubb som satsar på elitenivå for damer. Dei har betre opplegg på ritt, og syklar meir som eit lag. Per Korsvold held fram som trenar. Det er veldig bra for meg, med tanke på at han bur så nære. Han hjelper ikkje berre på treningsdelen, men på det meste rundt det heile, med sponsorar, det mentale og praktiske utfordringar, så det er bra for meg, seier Hestad.

Ho fortel at dei snakkast mykje på telefon, og at Korsvold set opp ein treningsplan i tovekersperiodar, og samtidig legg det opp mot ritt og jobben hennar.

– Eg har ei stilling på Rosendalstunet, som saman med ekstravakter i realiteten blir opp mot ei 80 prosent-stilling. Eg satsar på syklinga samtidig, eg trivst godt med det og syns det er kjekk trening. Det er litt lite miljø her i Rosendal-området, så eg må til Husnes for å treffa resten av klubbmiljøet, men eg trivst med å trena aleine også, understrekar ho.

– Eg stoler på Per, og har hatt god utvikling etter hans treningsplanar. Me samarbeider godt og eg vil prioritera syklinga litt no. Det er no eg må gjera det, legg Ingeborg til.

Til hausten ventar mest truleg sjukepleiar studiar i Haugesund, kombinert med vidare sykling.

Ritt i pinsen

Den nye klubben er lokalisert i Trondheim, men med syklistar spreidd landet over.

– Det blir nokre turar opp og møta resten av laget og trena saman med dei, gjerne samlingar i forkant av konkurransar, men eg er usikker på om det blir det før NM, men eg skal representera dei i NM, forklarer jenta som er 20 år i nokre månader til.

Dei siste vekene har ho hatt 15 timar på sykkelen i veka, med vekt på langkøyring og intervalløkter. I pinsen blir det ritt i Bergen i, «Fana 3 dager», som betyr fire ritt, to med køyring i rundar, eit temporitt og avslutning med fellesstart på måndagen.

– Fellstartrittet er på 50 km på Osterøy, og det blir køyrt hardt i bakkane, med mykje stigning, og opp og ned. Det blir tøft med fire ritt på tre dagar, men det er likt for alle, analyserer Ingeborg.

Ho vurderer seg sjølv som fersk på dette nivået, men håper å lukkast i NM, uavhengig om det gir medalje.

– Eg håper å visa igjen, slik eg klarte i Stjørdal sist, seier ho.

Konkurrerer med profflaga

Trenar Per Korsvold gler seg over framgangane til Ingeborg.

– CK Victoria er eit reint damelag, og ofte siste stoppestad før proffovergang for norske syklistar. Dei bit godt frå seg nasjonalt, og konkurrerer med profflaga. CK Victoria har følgjebilar, langing i langesonene, og mykje er akkurat som eit profflag. Kvinnherad Sykkelklubb har ikkje noko å stilla opp med til samanlikning, meiner Korsvold.

Han skildrar ein sykkelklubb med godt opplegg rundt samlingar, som køyrer ritt i blant anna Belgia og Spania med så gode resultat at det enda med proffkontrakt til eine jenta på laga.

– Det vil ikkje vera noko gamechanger for Ingeborg, men sykkel er ein lagsport der dei jobbar saman. Overgangen vil gjera mogelegheitene for gode resultat betre, men vil også gje ho betre sjansar til å utvikla seg vidare. Ho vil oppretthalda medlemskapet i Kvinnherad Sykkelklubb vidare, og er veldig takksam og glad for hjelpa og støtta klubben har gitt ho, seier Korsvold.