Byr opp til VM-fest på heimebanen

Laurdag 18. februar deltar omvikdelingane Ingeborg Hestad og Vidar Mehl begge i VM i E-sykkel. Det skal synast igjen i bygda dei kjem frå.

– Me må gjera ein fest ut av at me har VM-ryttarar frå bygda her. Difor steller me i stand ein skikkeleg VM-kveld her i gymsalen, seier altmogelegmannen Per Korsvold, som sjølv er og har vore ein habil syklist.

Mot 99 andre

Altmogelegmannen Per i dette tilfellet dekkjer roller som trenar, sponsoransvarleg, arrangementsorganisator, teknisk støtte og regelboklesar, for å nemna nokre. Ingeborg skal få konsentrera seg om å trena og førebu seg så optimalt som mogeleg.

– Eg køyrte gjennom løypa me skal konkurrera i går kveld, for å vera budd på kva som kjem, fortalte Ingeborg då ho og Per onsdag hadde ei lita synfaring i gymsalen til Omvikdalen skule.

Synfaringa innebar prøvekøyring av rulla i landslagsdrakta. Begge deler er relativt nyleg komne på plass, sendt frå sykkelforbundet.

I E-VM syklar alle deltakarane på same utstyr, kopla til same system. Norge har fire plassar i herreklassen, tre i kvinneklassen, og det deltar 100 ryttarar i begge klassane.

Det første rittet til Ingeborg startar kl. 2045. I det løpet må ho vera blant dei 30 beste for å få delta i andre rittet, som startar på slaget kl. 2118. I det tredje og siste løpet er dei berre ti som kjem til å vera kvalifiserte. Det bles i gang beint kl. 2143.

Ingeborg har tidlegare slått fast at ho må gje det ho har i første løpet, slik at ho kanskje har ein sjanse til å få sykla andre løpet.

Førebudd

– Det blir litt testing av utstyr og slikt no, men Ingeborg må byggja overskot neste veke. Difor blir det litt hardkøyr dei neste dagane, og så rolegare, forklarer Per Korsvold om førebuingane.

Programvara er ganske sofistikert, og veldig naturtru, meiner dei to syklistane, og viser til både luftmotstand og kor i køen du ligg blir tatt med i berekningane.

– Men det verkar betre i røynda, vedgår Per.

Alle har fått tilsendt rulle, som er kalibrerte og klare, men skal likevel verifiserast innan 48 timar før rittstart. Alle skal ha kamera og strøyming på seg under konkurranse, slik at den internasjonale sendinga frå VM kan henta bilete frå deltakarane sine kamera.

– Det er ein del krav, og no er ho inne i same dopingregime som andre idrettsutøvarar. Ingeborg må no melda frå kor ho er, til ei kvar tid, forklarer Per.

– Føler du deg klar for VM?

– No har eg følgt opplegget til Per. Då har eg fått ein heilt annan struktur på treninga. Eg merkar at eg har blitt betre trent, og samtidig har eg hatt to månader til å førebu meg opp i her, seier Ingeborg og prikkar seg sjølv på tinningen.

Lagar til folkefest

Under VM er planen at Ingeborg skal sitja på scenen i salen, medan strøyming frå VM-sendinga går på storskjerm i salen, ein sal som dei håper skal bli fylt opp med heiande publikum.

– Her er det ope for alle. Det blir kake, kaffi og brus, me lagar ei skikkeleg happening her. Me oppmodar alle til koma med flagg og banner og det heile, og heia Ingeborg fram, seier Per. Ordførar og idrettsråd kjem, det blir får videohelsingar frå Dag Otto Lauritzen og Vidar Mehl – som då er ferdigkonkurrert, og Arne Torget tar på seg konferansieroppdraget.

– Dette er arenaen for VM, og me håper folk kjem og vil ha ei kjekk stund, seier Per om det som må vera første gong det blir VM i Omvikdalen.

– Me har jobba med å prikka inn formtoppen til meisterskapen, og håper me har treft, sluttar Ingeborg.