Brakk foten og mista viktige konkurransar
Guro Femsteinevik brakk eit bein i foten dagen før ho skulle bryna seg på internasjonale storkanoner i Blink-festivalen. No er ho tilbake på rulleski, og er klar for å konkurrera igjen.
– Eg hadde sett fram til Blink-festivalen som er eit årleg høgdepunkt på sommaren. Derfor var det kjedeleg at eg ikkje fekk sjansen til å visa meg frem der. Til å byrja med kunne eg verken springa eller gå på rulleski. No har eg heldigvis fått klarsignal til å gå på rulleski, men eg er naturlegvis ikkje i den same forma som landslagskollegaane og dei beste er akkurat no. For meg handlar det i NM i rulleskiskyting om å få gode gjennomkøyringar.
– Kor mykje føler du at beinbrotet har sett deg tilbake, Guro?
Annonse
– Det er vanskeleg å svara konkret på det. For det er ikkje sikkert det vil ha så stor betydning for vintersesongen, dersom eg snart kan byrja å springa og kjem i full trening igjen. Det var ikkje det verste tidspunktet eg skada meg på, ettersom det framleis er mange månader igjen til juniorverdsmeisterskapen, som er vinterens store mål, seier Guro.
Fekk klarsignal frå legane
Det var i samband med ei treningsøkt at Guro var uheldig og brakk foten. I starten av opptreningsperioden blei det stort sett standplassdrill og lett sykling, før ho så smått kunne ta fram rulleskiene. Dei siste røntgenbileta var såpass oppløftande at legane no har gitt ho klarsignal for å køyra hardøkter på rulleski igjen.
– Eg tenker å stilla opp i norgesmeisterskapen i rulleskiskyting sjølv om eg ikkje har forhåpningar om å kjempa i toppen der. Fokuset blir å få gode gjennomkøyringar både på standplass og i sporet. Eg har i den perioden kor eg har vore skada brukt ekstra mye tid på standplass. Vonleg får eg utteljing for det, seier 20-åringen frå Hatlestrand til Grenda.
Annonse
Stortrivst på landslaget
Guro Femsteinevik fekk den tredje sesongen på juniornivå spolert av sjukdom. Hun slo sterkt tilbake sist vinter. Det blei både junior-VM-deltaking og gode prestasjonar i dei nasjonale renna. Det førte til at den yngste av Femsteinevik-søstrene fekk plass på junior- og utviklingslandslaget
– Det er veldig bra opplegg der. Eg har fått med meg tre av fire samlingar, og ser frem til nye samlingar utover hausten. Den eg ikkje var med på sto eg over på grunn av beinbrotet. I førebuingane til min andre og nest siste sesong i 20-22-årsklassen har eg hatt litt ekstra fokus på overkroppsstyrke. Det i håp om at eg skal bli sterkare og meir eksplosiv, seier det lokale skyttartalentet som ser frem til å ta på seg startnummeret igjen.
