Blir utviklingssjef i Sandnes-Ulf

Etter snart tre år i utlandet returnerer Lars Johan Myklebust til Norge. Torsdag byrjar han i ein spennande jobb i Sandnes-Ulf.

Tysdag signerte han arbeidskontrakten, onsdag fekk han passet ut frå visumkøen til India og torsdag morgon sat han på flyet til La Manga i Spania.

– G17 og G19-laga til Sandnes-Ulf er der og deltar i ei firenasjonarsturnering, seier Lars Johan Myklebust til Grenda dagen før han reiser sørover.

 

Frå agentbyrå

Stillinga som utviklingsansvarleg byr på eit breitt utval arbeidsoppgåver for uskedelingen.

– Eg blir ansvarleg for laga frå G16 opp til rekruttlaget, inkludert personalansvar for trenarar og spelarar på dei laga. Eg får også ansvaret for Sandnes Talent, som er eit samarbeid som ein har med dei lokale klubbane. Der samlar me dei beste spelarane i alderen 12 til 15 år i nedslagsfeltet, til ei eigen trening i veka, fortel 35-åringen.

Etter to år i Brussel-klubben BX, forøvrig eigd av Manchester City-kapteinen Vincent Kompany, har Myklebust vore knytt til agentfirmaet Star Agency i Dubai det siste halvåret.

– Planen var å returnera til Dubai no etter julefeiringa, men visumprosessen drog ut. Difor var eg eigentleg på veg til India og to-tre månaders jobbing der då Sandnes-Ulf lyste ut stillinga, og tenkte ikkje så mykje på han, forklarer han.

 

Til India

Og trass i at Myklebust var komen langt i vaksinasjonsprogrammet som er nyttig å ha før avreise til India, så tok også den visumprossesen tid.

– Etter kvart som tida gjekk, vart jobben i Sandnes meir og meir interessant, og eg vart tipsa om at eg burde søkja, seier han.

Men det tok tid før fotballklubben tok kontakt med han. Eigentleg skulle han allereie ha vore i India då dei ringte og bad han koma til intervju. Då gjekk det raskt. Fredag var han tilbake i Sandnes til andregongsintervju, der han mellom anna leia ei økt for 14-åringane til klubben.

Tysdag vart dei samde om vilkår, og torsdag morgon sit han altså på eit fly til La Manga for å ta til i jobben.

 

Heim igjen

Trass i ung alder, har han opparbeidd seg ein solid fotball-CV, med trenaroppdrag i både Brann, Norheimsund, Rosendal og Trio før han reiste til Brussel.

– Sandnes Ulf er ein spennande klubb å koma til. Det er ein av dei 20 beste laga i landet, dei har ny stadion på gang, og dei verkar til å ha lært raskt i den korte tida dei har vore ein toppklubb, seier Myklebust.

Han skal ikkje berre sitja på eit kontor og trykkja på ein pc.

– Eg skal ikkje ha ansvar for noko lag, men eg skal mellom anna ha tre økter på Vang Toppidrettsgymnas i veka.

– Korleis blir det å vera tilbake i Norge?

– Etter nesten tre år ute, trur eg det blir bra. Stillinga er så interessant at ho trumfar eventyr ute. Det er mykje positivt i å vera utanlands, men også mykje positivt med å vera i norsk fotball òg. Det blir langt meir stabilitet enn førre halvåret, og det blir meir fotball og fagleg utvikling, sluttar han.

Med det vert han kollega med Ronny Holmedal som er utviklingssjef i Sandefjord.