Beste hingstefølet

Ein unghest frå Omvikdalen gjekk heilt til topps i utstillinga på Stend.

Søndag 12. november arrangerte Osterøy Fjordhestlag følsjå på Stend ved Bergen, Alle rasar var velkomne, og det vart lokka med 5.000 kroner til beste fjordhesthingsteføl og 5.000 til beste fjordhoppeføl.

Vinnaren blant hingstane vart Feedts Visjon, oppdretta av Samson Feedt i Omvikdalen. Følet, som vart født i juni, fekk god omtale og karakterane 8 - 7,5 - 7,5 - 8 - 8 (rasetype/preg, kroppsbygnad/muskulatur, beinkvalitet/beinstilling, rørsle og heilskap). Det møtte seks hestar i klassen. Mora til sigerherren er den gode hoppa til Samson, Feedts Frøydis. Faren er den tidlegare lagshingsten Glød til Osterøy Fjordhestlag.

 

Landskåringa

– Veldig kjekt å koma borti noko slikt. No håpar eg hesten vil gjera det bra vidare òg. Tanken er at han skal stilla på landskåringa for fjordhestar i Nordfjordeid om tre år, det er det som er det store, fortel Samson Feedt.

På utstillinga var han også eigar av Feedts Visjon, men no er hesten seld til ein hingsteoppdrettar i Førde. Enn så lenge har følet bustad i ein stall på Stuland, men reiser nordover om ikkje lenge.

Samson stilte i tillegg med Feedts Jarlen (etter Alme Baron) på Stend, og han skaffa seg sløyfe. Jarlen er no til sals.

– Eg håpar nokon vil ta seg av han også. Eg er blitt for gamal til å driva med trening og slikt, seier den erfarne hestekaren, som framleis skal eiga sine tre vaksne fjordhestar.

 

Bekymra for framtida

Samson Feedt er elles bekymra for framtida til fjordhesten og dei andre norske rasane dølahest, lyngshest og kaldblodshest.

– Det er sagt at dei nesten er blitt raudlista grunna alt for få bedekkingar. Mange satsar heller på importerte rasar, men ein burde også halda oppe dei nasjonale rasane, det er heilt sikkert. Fjordhesten er minst like allsidig som dei importerte hestane. Han har veldig godt lynne, er ein god familiehest og kan brukast til alt, seier Samson Feedt, som minnest toppåra til Kvinnherad Fjordhestlag då dei på det meste stilte med heile 19 ekvipasjar på eit arrangement.