Berland ny trenar for skiskyttarlag

Knut Tore Berland frå Matre skal komande sesong sørge for at skiskyttarane på det private laget Team Norgesbakeriet hevdar seg i toppen.

Berland, som blant anna er tidlegare trenar for kvinnelandslaget i skiskyting, har dei siste åra hatt ein pause frå toppidretten grunna mangel på motivasjon. Men no er motivasjonen tilbake på topp, og han ser fram til å ha ansvaret for nokre av Norges fremste skiskyttarlag komande sesong.

– Det er to år sidan eg hadde ansvaret for eit lag, og gler meg til å ta fatt på utfordringa. Laget innehar eit veldig høgt nivå, og det er min jobb å få det overført til resultat. Det er mange om beinet i norsk skiskyting, og vi vil vera blant dei som er med og kjempar, seier Berland til Grenda.

 

Hårete mål

Laget satsar stort, og ønskjer å ha minimum ein av sine løparar på startstreken når skiskyttar-VM går av stabelen i Oslo 3. mars 2016. For å få det til er dei avhengig av å trena betre enn dei andre.

– Vi har som mål å representera Norge internasjonalt. Og i teorien er det 12 utøvarar framfor oss i køen, så vi håpar vi kan trena både lurare og betre enn dei andre for å få det til. Det er seks plassar på A-landslaget, og vi må slå nokon av dei for å stå på startstreken i Oslo 2016. Det er sjølvsagt ikkje Emil Hegle Svendsen og Bø-brørne vi skal slå, men dei bak der igjen. Og det har eg god tru på at vi kan. Det er ingen som er uslåelege, vi må bare bevisa at vi kan ta eit løft fysisk, samtidig som vi skal skyta godt, seier han.

 

Frir til Kvinnherad

1. oktober går avtalen laget har med Norgesbakeriet ut, og dei er difor på hyppig leit etter ny namnesponsor før vintersesongen. Og sjølv om det allereie er eit par seriøse kandidatar på bordet, frir Berland til heimkommunen sin.

– Om det er nokon bedrifter heime i Kvinnherad med veldig mykje pengar, kan dei berre ta kontakt, oppmodar han.