Banens beste igjen

Laurdag kveld vann Storhamar heile 41-24 over Fredrikstad. Sjølv om det kanskje høyrest slik ut, resultatet teke i betraktning, er ikkje sistnemnde noko dårleg lag. Klubben ligg nemleg på 5. plass på tabellen. Dei opna også best på Hamar, før vertane kom i siget. Ved pause var stillinga 17-11.

«Anført av ein meget god Tina Abdulla, auka Storhamar leiinga jamt og trutt», skriv Hamar Arbeiderblad (HA).

Tina Abdulla frå Husnes, og med bakgrunn frå Kvinnherad Handballklubb, vart toppscorar. Ho fekk utteljing på heile åtte av ni skot.

I bra form

– Vi møtte eit bra lag. Også i dag hadde vi litt startvanskar, men vi kom oss utover i kampen. Så er det deilig å banka inn ballen åtte gonger frå kanten. Eg føler at både laget og eg er i bra form, sa ho til HA etter kampen.

Storhamar Håndball Elite ligg på ein trygg 2. plass på tabellen i den såkalla Rema1000-ligaen. Dei 17 fyrste kampane har enda med 15 sigrar og to tap. Faktisk er det berre to poeng opp til Vipers Kristiansand, men sørlendingane har vunne alle sine 16 kampar.