Avslutta skyteskule med innartiarar
12 barn og ungdommar har brukt tida etter jul til litt ekstra undervising når Kvinnherad Skyttarlag har arrangert skyteskule
Publisert
– Dette er eit viktig tiltak for rekrutteringa vår, understrekar leiar i ungdomsutvalet Stig Sjo Kårstad.
Han har etter jul arrangert sin første skyteskule som ungdomsleiar, og førre veke sette dei punktum for undervisinga. I staden for skriftleg eksamen vart det skytekonkurranse mot foreldre, og munnleg eksamen vart erstatta av pizza, kaffi og brus.
Annonse
– Me inviterte til skyteskule i haust også, men då var det ingen som meldte seg, mykje truleg grunna dei rådande koronarestriksjonane. Når me inviterte no etter jul, så meldte 12 seg på. Me fordelte dei nye skyttarane på to ulike vekekveldar, og har hatt fem kveldar med teori og skyting på miniatyrbanen her i skyttarhuset, seier Kårstad.
Skyttarane, som er i alderen 10 til 17 år, har fått prenta inn dei tre tinga som ungdomsleiaren meiner er viktigast på skytebanen:
– Tryggleik, tryggleik og tryggleik. Det skal prentast inn hos alle, understrekar han.
Instruktørar har vore Erika Nygaard og Jan Åge Sjo Kårstad. Måndag etter vinterferien byrjar skytetreninga innandørs. Uteskyting blir etter påske.
Annonse
– Skyting er ein sport for alle, og det er eit kjekt miljø her, skryt ungdomsleiaren, og gler seg over at skytefamilien veks.
