Avslutta med stil

– Me er eigentleg nøgde, i alle fall med den positive utviklinga. Me er sjølvsagt ikkje nøgde med å rykka ned, men utviklinga har vore i rett lei, seier trenar Øystein Ersland etter at Odda vart slått 5-1 på laurdag.

I tillegg til å vera best på Folgefonnhalvøya, låg også sisteplassen i puljen som ein Svarte-Per begge lag ønskte å unngå.

– Det har vore litt tøffe kampar i dette lokaloppgjeret før, og Odda kom med eit sterkt lag. Når me no ikkje hadde press på oss, så fekk me endå meir vist kva som bur i spelarane og laget. Det var ei verdig avslutting, held Ersland fram.

Han slår fast at hausten viser ein at ein har noko i 4. divisjon å gjera, med det mannskapet ein har hatt tilgjengeleg i år. Til neste år blir det altså 5. divisjon på dei blåraude. Det blir mest truleg utan Øystein Ersland ved roret.

– Eg har avtale ut året, så i utgangspunktet er eg ikkje trenar til neste år. Eg er nøgd med jobben me i trenarteamet fekk gjort, sjølv om me skulle ønska me fekk det endå betre til. Det har vore viktig for oss å stå løpet ut, uavhengig av tabellsituasjon, sluttar Ersland.