Arrangerer toppturfestival for 10. gong

Eit par spennande arrangement dei komande vekene syt for mykje liv og rør på Rosendal Turisthotell. No til helga vert det invitert til jegertreff i Rosendal, og dei skal ha overnatting og servering på turisthotellet. Helga 15. til 17. mars er det klart for ei ny utgåve av Rosendal Toppturfestival.

– Dette er 10. gongen festivalen blir arrangert. Dei sju fyrste åra var det selskapet Bre og fjell som stod bak, etterfølgde av to år med Sjur og Laila (Rosendal Event). Så kom pandemien, og seinare har ikkje festivalen blitt arrangert, fortel Ove Hillesland på Rosendal Turisthotell. No er det Sturla Aakre, friluftslærar på Bømlo folkehøgskule, som har overteke regien.

Turisthotellet vert base for festivalen. På programmet står to dagar med guida toppturar. Aktivitetane er delt i tre kategoriar. Det er eige program for nybyrjarar, så har du dei som vil delta på moderate toppturar, det vil seia Omnatind, Ulvanåso og liknande. Siste gruppa heiter «komplekse turar», og inneheld alternativ som Melderskin, Gygrastol og Store Bjørndalstind. Alle deltakarane kan også få med seg eit føredrag med den lokale eventyraren Margretha Flatland.

Toppturfestivalen er fullbooka, noko som betyr 30 påmeldte og sju-åtte guidar.