Arrangerer Baroniløpet: – Vi går langt for å gi eit tilbod til barn og unge

Rosendal Turnlag har bestemt seg for å arrangera Baroniløpet førstkomande søndag.

– Vi har fokus på barn og unge, og går langt for å gi dei eit tilbod. Difor har vi bestemt oss for å arrangera løp på søndag for barn og unge til og med 19 år. Då med eit sterkt fokus på smittevern, og i tråd med dei reglar og retningslinjer som gjeld, seier dagleg leiar Jonathan Byrkjenes.

Det betyr blant anna at dei kjem til å sperra løypa for uvedkomande, slik at dei har kontroll på kor mange som er inne på området til kvar ei tid.

– Det er maks 50 personar som gjeld, så det vert eit reknestykke. Vi som arrangør er pliktige til å gjennomføra dette på ein god og ansvarleg måte, og bed difor om forståing for at dette er eit løp. Dei som skal heim frå tur og skal køyra forbi må gjera det, men ikkje stopp opp og gå inn i løypeområdet, seier Byrkjenes.

120 år

Turnlaget har snakka med kommuneoverlegen, og har ein god plan på korleis dei skal gjennomføra det som blir det første arrangementet i 120-årsjubileumet til laget.

– Vi er ekstra glade for å kunna arrangera konkurranse igjen. Det kjem til å bli eit trygt og godt arrangement som forhåpentlegvis bidreg til motivasjon og idrettsglede, seier Jonathan og legg til:

– Det er mange som har gleda seg til dette. Eg trur det er viktig at vi kan gjera så mykje som vi kan for å gi barn og unge moglegheit for å konkurrera og ha aktivitet. Vi gler oss stort til løp på søndag.