Andrei med årsbeste i landet under Rosendalsleikane

30. juni reiser Andrei Bringedal til Verdsungdomsspelen, altså eit slags VM for ungdom. 13 åringen skal der tevla i 60 meter, 200 meter og lengde, det same som han deltok i under Rosendalsleikane.

Han koste seg godt under friidrettskonkurransen på det nye anlegget i Rosendal.

– Eg er veldig nøgd med det eg har fått til her, både i dag og i går, sa han til Grenda søndag.

Laurdag var det 60 meter, der 8,19 også er eit svært sterkt resultat i G13-klassen. Søndag var det nemnde 200 meter på 26,45, og 4,82 i lengde. Felles for alle tre tevlingane var ny personleg rekord.

Under 200 meteren vart han pressa hardt gjennom svingen i dei første 100 meterane.

– Eg merka at han innanfor meg gav på gjennom svingen, så eg måtte ta i for å halda tritt. Då eg var ferdig med svingen, så var det berre 100 meter igjen, så då gav eg berre full gass, smiler 13-åringen litt smålåtent.

Det var spennande løp, og det blir ein spennande sommar. Andrei har sakna litt konkurranse, og det fekk han denne søndagen.

– Det var veldig gøy! Eg treng å få den konkurransen, for det gjer at du pressar deg sjølv til litt betre tider. Du hentar fram litt ekstra krefter, meiner Andrei.

I Gøteborg blir det i alle fall konkurranse, for då kjem han til å møta fleire av dei han tevla mot i fleire av dei han møtte under Tyrvingleikane i fjor. Der vart det eitt gull og tre sølv.

– Det er blir uansett gøy og ei oppleving, seier Andrei om det som ventar i Sverige.