Alva (15) fekk trena med forbildet sitt: – Har eit ønske om å nå like langt

KHK sitt A-lag, saman med fleire frå J16-laget, fekk storfint besøk av handballproff Tina Abdulla, som med glede via èin av dei allereie få dagane av juleferien sin til å trena gjengen.

– Eg er jo ikkje nokon trenar, så det er både spesielt og kjekt på same tid. Med det sagt, så er det nok ikkje trenar-yrket eg skal satsa på, lo Abdulla muntert like før ho sette dei frammøtte i sving med oppvarminga.

Planen hennar for økta var å visa KHK litt av måtane Storhamar trenar på.

Forbilde

– Det er veldig kjekt, smilte Alva Kaldestad Gjerde (15), som har følgt med på Tina og karrieren hennar opp gjennom.

Kaldestad Gjerde kunne også fortelja at ho hadde vore med og trena med Abdulla tre gonger tidlegare.

– Det er alltid kjekt å få sjå korleis dei jobbar i eliteserien. Det er dessutan veldig imponerande det som ho har fått til, og ho er eit forbilde for oss som har eit ønske om å satsa på denne sporten, rosa Kaldestad Gjerde.

(Saka held fram under bildet).

15-åringen, som alt har nærare 10 års erfaring frå sporten, kunne fortelja at for ho er handball meir enn berre ein hobby.

– Eg har eit ønske om å nå like langt som det Tina har klart. Derfor trener eg fem til seks gonger i veka, la ho til.

Stas

– Det er så merkeleg at folk ser på meg som eit forbilde, for eg tenkjer jo ikkje over det sjølv. Men det er sjølvsagt veldig stas, sa Abdulla audmjukt.

Ho kunne fortelja at det blei ein kort juleferie i år, og at allereie 2. juledag gjekk turen tilbake til Hamar for å få med seg alle treningane. Til sommaren er ho ferdig i klubben, og skal då i gang med nye utfordringar.

– Eg byrjar jo å dra på åra, og det er kjekt å prøva noko nytt før det er for seint. Men eg har hatt mange flotte år i Storhamar, og trur framtida blir spennande, slutta ho.