Alexandra og Ådne med sterke prestasjonar i Pingvinlekene

Heile 560 deltakarar var med då Gneist skipa til Pingvinlekene i Leikvanghallen i Bergen i helga. Trio-utøvarane Ådne Opsanger-Tveit og Alexandra Tveit Rosendahl beit godt i frå seg i ei handfull øvingar kvar.

– Ådne persa i både lengde og høgde i helga. Det vart sølv i begge øvingar, etter 5,29 i lengde (betring av pers med 7 cm) og 1,60 meter i høgde (3 cm betring). Ny pers vart det også på 200 meter med 27,75, det heldt til 8.plass, melder il-trio.no.

I tillegg tok han sjetteplass med 8,57 på 60 meter, samt femteplass på 60 meter hekk med 9,81. Det er over sekundet betre enn tidlegare pers, men normalt er det 80 meter som er korthekk-distansen for 14-15-åringar.

Tre gull

Alexandra kom heim med tre gullmedaljar, samt eitt sølv og to bronse.

– Beste prestasjonen var nok 10,61 på 60 meter hekk. Ho knuste persen på distansen under Nornalekene for to veker sidan og forbetra den med nye fem hundredelar i dag. Overlegen siger også på 600 meter med 1.51,04. I høgde var ho utan konkurranse og presterte ikkje opp mot sitt beste (1,25), vurderer nettstaden til IL Trio.

Alexandra Tveit Rosendahl tok bronse på 200 meter med 29,64, og så vart det sølv i lengde med 4,53 og 3.plass på 60 meter med 9,00.