Ådne og Alexandra sanka inn gullmedaljar

Arrangøren IL Trio kan vera godt nøgd med årets Kvinnheradmeisterskap i friidrett. I nydeleg, men kaldt haustvêr stilte 58 deltakarar til start på Husnes stadion. I tillegg deltok 22 ungar i alderen 2 til 5 år i det nystarta Knøtteløpet over 100 meter.

– 80 deltakarar er rekord i mi tid, kommenterte primus motor Are Ulseth til Grenda.

Han vonar dette kan bety ein vekst for friidretten i Kvinnherad.

– I knøtteløpet håpa vi på 15 deltakar. Når det vart over 20, må vi vera svært nøgde, la han til.

Dei aller fleste utøvarane tilhøyrde IL Trio, i tillegg stilte eit titals frå Rosendal turnlag og Uskedal idrettslag. Det vart konkurrert i løp (60 meter, 200 meter, 600 meter og 5.000 meter), hopp (lengde og høgde) og kast (slegge, diskos, kulestøt og liten ball).

«Særleg må vi nemna at det var heile 14 deltakarar i sleggekast. Det må vera ytst sjeldan å sjå i eit friidrettsstemne i Hordaland», heiter det på Trio si heimeside.

40 år som dommar

Då Grenda var innom arenaen prøvde 14 år gamle Sander Sæverud Jensen seg på diskos.

– Ja, den er fin. Berre ta det rolegare i byrjinga og strekk ut beina, instruerte dommar Arne Torget etter kastet på 17,77. Torget jubilerte elles på stemnet, for han fekk dommarkortet i 1983, 16 år gamal. Han kunne såleis feira 40 år som dommar.

To av dei største talenta på stemnet var syskenbarna Alexandra Tveit Rosendahl og Ådne Opsanger-Tveit. Begge kunne reisa heim med fem gullmedaljar; i høgde, lengde, 60 meter, 600 meter og 5000 meter.

– Eg spesialiserer meg på sprint og hopp, opplyste 14 år gamle Ådne frå Valen.

Akkurat då var han i ferd med å førebu seg til høgdekonkurransen.

– Eg prøvde meg på høgde tidlegare i dag. Kanskje eg ikkje var skikkeleg oppvarma, for eg fekk ikkje til tilløpet. Målet mitt i dag er å hoppa opp mot persen på 1,57. Og så har eg veldig lyst til å koma over persen, fortalde han.

Fekk is

Han innfridde fyrste del av ynsket, men mangla bittelitt på andre del. Ådne enda nemleg på 1,55.

Kusina Alexandra hadde ingen større resultatmål.

– Ingenting, svarte 13-åringen frå Sunde på spørsmålet om målet for dagen.

Persen hennar var på førehand 1,42. Denne dagen nøya ho seg med 1,35.

Deltakarane i meisterskapen fekk både medaljar og ikkje minst is under premieutdelinga.