Spør om likeverdig kulturskuletilbod

I forkant av kommunestyremøtet torsdag spør Svein Åge Vangdal om desentralisert kulturskuletilbod.

Senterparti-nestoren Svein Åge Vangdal spør ordføraren om kulturskuletilbodet i Kvinnherad.

– Kommunestyret vedtok for eit par månadar sidan Temadelen av Plan for oppvektstkår, der det vert vektlagt at alle barn og unge skal ha eit likt eller likeverdig tilbod i heile kommunen.

Lenger tilbake, då kulturskulebygget på Husnes skulle realiserast, vart det presisert og lova at kulturskulen sine desentraliserte tilbod skulle vidareførast og ikkje nedprioriterast. Noko mange i dei dei bygdene som ikkje kan nytta seg av tilboda på Husnes, var uroleg for.

I dag ser ein at tilbodet om individuell instrumentopplæring framleis vert gjeve i heile kommunen. Men eit heilt avgjerande tilbod for å rekruttera elevar til slik opplæring, og skapa interesse og tilknytning til Kvinnherad kulturskule, er borte frå ein del av kommunen.  Dei minste barna frå Varaldsøy, Hatlestrand og Ølve i alderen 5-8 år, har mist det viktige tilbodet dei hadde om musikkleik og grunnkurs.  Dette er teke opp med skulen, utan positiv respons, skriv Vangdal i samband med sitt spørsmål.

– Spørsmålet til ordføraren blir difor om han vil ta saka opp med Kvinnherad Kulturskule, med mål om at dei nemnde tilboda er på plass for neste skuleår, og at skulen marknadsfører dette aktivt t.d. gjennom ein demonstrasjontime ved Hatlestrand skule/barnehage i løpet av vinteren, slik ein gjer ved andre desentraliserte einingar, skriv Vangdal, og ber ordføraren samtidig drøfta idear om delvis fjernundervisning i kursa skulen arrangerer for ungdommar innan digital komponering og biletkunst.