Spennande haustferieprogram på Sunnhordlandtunet i haustferien

Håvard Sætrevik

Håvard Sætrevik

haavard@grenda.no

Publisert: 4. oktober 2020, 14:00

I år kan museet tilby eit spennande program for både små og store i haustferien.

Dei startar ut med temakveld måndag 5. oktober med tittelen «Fordommar i krig og fred». Der vil fyrst konservator Helge Pedersen halda foredrag om raseteoriane og ideen om eit rasehierarki som nazistane bygde programmet sitt på før krigen.

– Også her i Noreg var det ei utbreidd tru blant vanlege folk at ein kunne dele inn menneske i meir eller mindre verdfulle rasar etter ytre fysiske kjenneteikn, og fordommane mot jødane var mange. Etter krigen skifta diskrimineringa fokus i Noreg og mange andre land. No var ein ikkje lenger oppteken av å bli kvitt jødane, men av å fjerna alle spor etter tyskarane. Kjærastar og koner til tyske soldatar blei internerte, og skulle helst sendast til Tyskland ilag med borna sine. Barn med tysk far blei sett på som hjerneskadde og behandla som mindreverdige både i skulen og i samfunnet elles, skriv museet i sin omtale av haustferieprogrammet.

Ei av dei som opplevde dette på kroppen var Karin Maria Korsvik, dotter av ei ung mor frå Bergen og ein tysk soldat stasjonert på Dragefjellet skole. Ho vaks opp i fosterheim på Fitjar, og formidlingsleiar Johanne Øvstebø Tvedten vil fortelja hennar historie i framføringa «Ei jente på Fitjar – eit kors i Alakurti».

Tysdag 6., onsdag 7. og torsdag 8. oktober blir det aktivitetar for barn på Sunnhordlandstunet. Då kan dei vandra mellom doktor Proktor sine usannsynlege dyr, fiska i sildeutstillinga, eller byggja seg ein barkebåte ute ved bassenget. Dei minste kan også vera med Johanne Ø. Tvedten og leika i «Landet ved bekken» der Dustefjerten og Bollefisen og alle dei andre bur. Figurane står i Vidsteenparken, og opplegget byggjer på Rune Belsvik sine bøker.

Onsdag 7. oktober på ettermiddagen får ein følgja Tore Lande Moe på historisk byvandring i Leirvik. Vandringa varer 1 ½ time, og grensa går ved 50 påmelde, melder direktør ved Sunnhordland Museum Linda Øen.