Spansk/norsk/brasiliansk på turisthotellet

Håvard Sætrevik

Håvard Sætrevik

haavard@grenda.no

Publisert: 22. august 2018, 07:37

Denne veka vert det spennande konsert med brasiliansk musikk i norsk-spansk innpakking i Rosendal.

Torsdag 23. august blir det smektande brasilianske tonar å høyre på Turisthotellet med Luzia Molina frå Spania og Bjarne Øymyr av den meir kortreiste sorten.

I fjor sommar kom Luzia til Rosendal for å halde ein konsert. Ho likte seg så godt at ho like godt vart verande ein heil månad. Ho trefte då Bjarne Øymyr. Dei spelte litt i lag og fann raskt «tonen» – noko som resulterte i ein konsert på Gjesten på turisthotellet.

Det ga meirsmak, og Luzia valde å kome attende. Ho har gjennom sommaren stått i spissen for konsertar på turisthotellet kvar torsdag. No blir det duokonsert, og mykje av materialet vi får presentert er frå Brasil. Luzia har vore opptatt av denne musikken i lang tid, og Bjarne Øymyr har spelt mykje av det same repertoaret frå ein jazz-ståstad.

– Musikk handlar i stor grad om kommunikasjon. Lytte på kva andre musikarar gjer og respondere. Eg føler at vi kommuniserer veldig bra. Det gjev eit stort rom for improvisasjon og leikenheit, seier Luzia Molina i ei pressemelding, der dei legg til at dei gler seg begge til konserten.