Denne muntre familien minnar forbipasserande at det berre er ei veke att til Festidalen. (Foto: Håvard Sætrevik)

Snart brakar det laus mellom fjella i Uskedalen

Om ei veke er det klart for Festidalen 2018 på Dønhaug i Uskedalen.

Festidalen har også i år eit svært variert program, som spenner mellom vakre folketonar frå Ingebjørg Bratland og elektronisk dansepopmusikk frå Fanny Andersen, eller mjuk americana frå Ida Jenshus og ein 70- og 80-tals hitparade frå coverbandet Fagernes Yacht Klubb. Og så blir det kul rap frå Kamelen og Lars Vaular, for ikkje å snakka om rotekte rock med sjølvaste Raga Rockers. Vêret er alltid eit spaningsmoment for festivalen, men førebels ser det svært bra ut på langtidsvarselet – med sol og 18 grader når vi går inn i festhelga. Vi har laga ei oversikt over artistane som skal opptre fredag 29. og laurdag 30.juni, slik at du kan lesa litt medan du gler deg.

Artikkelen held fram under annonsen.

 

Ida Jenshus

(Alle foto: Pressefoto)

Det vert garantert ein mjuk og behageleg start på festen på jordet, når Ida Jenshus går på scenen fredag ettermiddag. No er det ti år sidan countryrockaren debuterte med albumet «Color of the Sun». Festidalen lovar «smud americana» frå 30-åringen frå Steinkjer. – Dette vert mjuk nyting i amerikansk drakt – først og fremst veldig vakkert, lovar Festidalen.

 

Bob Hund

Etter ein mjuk start på fredagskvelden vert det i følgje Festidalen «raspande galen fest» på scenen når dei skånske indie-rockarane Bob Hund skal spela på Dønhaug. Gjengen har spela humoristisk, energisk live-musikk i 25 år, og gav ut første albumet sitt i 1993. – Med karismatisk, skånsk dialekt og ein knabben sjarmkonto syg dei framleis til seg nye fans i alle aldrar. Dette er show, meiner Festidalen.

 

Artikkelen held fram under annonsen.

I am K

– Dette er no, og dette er framtida, skriv Festidalen om fredagskveldens tredje artist, I am K. Frontkvinne og hovudlåtskrivar er Oda Ulvøy, og ho møtte resten av gjengen under musikkutdanning i Agder. Bandet sjonglerer mellom pop, elektronika og rock, og var klare med debutalbumet «Humans» tidlegare i vår. Dei har allereie blitt samanlikna med Highasakite og vart valde som vinnarar av Vestlandssatsinga 2018.

 

Halie

Musikkmeldar i BT gjennom 30 år, Einar Engelstad, sa han aldri hadde sett ein meir overtydande debut frå ein 16-åring, enn då Hanna Emilie Grung gjekk på scenen på Kvarteret for første gong. Det var i fjor, og no er ho under vengene til Made Management, som også husar Sigrid og AURORA. Ho går framleis på vidaregåande, men skriv alle låtane sine sjølv. Halie har allereie begeistra nasjonal og internasjonal musikkpresse. – Dette talentet kjem til å nå himmelhøgt, meiner Festidalen om fjerde artist fredag kveld.

 

Artikkelen held fram under annonsen.

Dagny

Dagny. (Foto: Michelle Mayer)

Tromsøartisten Dagny Norvoll Sandvik har sidan debuten i 2015 blitt strøyma mange titals millionar gonger, hatt gig saman med Justin Bieber i London, blitt billboardlista og vore på turne i USA. – Dagny er alt ei popstjerne, både innaskjers og utaskjers. «Backbeat», «Love You Like That» og «Wearing Nothing» er alle herlege sommarlåtar perfekte for juninetter i Kvinnherad, meiner Festidalen.

 

Lars Vaular

Avsluttingskonserten fredag kveld vert toppa med Lars Vaular. Hiphop-artisten frå Åsane debuterte som soloartist i 2007. Då hadde han fleire utgjevingar frå duoen Tier’n og Lars bak seg. Første soloalbumet «D’e glede» kom i 2009 og det vart nominert til Spellemannsprisen i klassen hiphop. Andrealbumet og fjerdealbumet vann han Spellemannsprisar for, og i 2015 vart han nominert til tre nye prisar. Seinare har Vaular vunne heidersprisen på P3 Gull og han fekk Dialektprisen frå Norsk Målungdom i 2010 fordi han har ei medviten dialektbruk i media. – Lars pushar grenser, tek sjansar og er ein kompromisslaus kunstnar. Få avsluttingskonsertar på Øya har fått meir positiv merksemd enn den han gjorde i fjor, skriv Festidalen. I april feira Lars Vaular over 10 år som artist med eit stort show i Oslo Spektrum. – Han er eit kraftsenter i norsk hip hop. Ei hylla hitmaskin. Duden sel ut salar og festivalar landet over. Radio og TV elskar han. Publikum elskar han. Og Festidalen elskar han, slår arrangørane fast på sine nettsider.

 

Laurdagen:

Artikkelen held fram under annonsen.

Ingebjørg Bratland

Laurdagskvelden på Dønhaug vert opna med Ingebjørg Bratland si smygande og vakre stemme. Folkemusikaren frå Vinje har ein særeigen songteknikk og formidlingsevne. – Med si fengslande stemme har Ingebjørg Bratland løfta tradisjonell og nymotens folkemusikk opp og fram i det norske popbiletet. Ho har bergteke både Kongen og publikum landet over. Hos oss kjem ho for å begeistra deg, lovar Festidalen.

 

Festidalen

Fanny Andersen

Utan korkje plateselskap eller management i ryggen leverte Fanny Andersen debutsingelen «Kids» seint i 2016. – Med det var mykje gjort. Alle ville ha ein bit av Fanny, skriv Festidalen på sine nettsider. Fanny Andersen er andre artist på scenen i Uskedalen laurdag kveld. – Følg med, for dette er ein artist med eit enormt potensiale, og komande norsk dronning av EDP (Electronic Dance Pop), hevdar Festidalen.

 

Hkeem

Artikkelen held fram under annonsen.

Abdulhakim Hassane er i følgje Festidalen ei ny og funklande stjerne på den norske pophimmelen. 2017 var Hkeem sitt år. Hiten «Fy Faen» vart snurra meir enn 30 millionar gonger på Spotify, og hamna på viral-lista i 12 land og vart topp 10 på den globale viral-lista. – Dette er lydsporet til søte kveldar og gode stunder, rytmar til vorspiel, fest og nachspiel, meiner Festidalen.

 

Kamelen

Hiphop- og rapartisten Marcus Kabelo Møll Mosele er betre kjend under artistnamnet Kamelen eller Slim Kamel. Under Festidalen er han fjerde artist laurdag kveld. Rapparen frå Bergen vart kjend i 2015 då han rømte frå politiet si varetekt samstundes som han sleppte singelen «Si ingenting». Artisten fekk mykje merksemd i pressa. Den siste tida har han selt ut mange konsertlokalar, som Rockefeller, Sentrum Scene og Verftet. – Kamelen serverer eksplosive hits og konsertar for feite hiphop-festar. At han og Lars Vaular leverte walk-in-låten til Cecilia Brækhus på Koengen seier sitt. Historieforteljinga er den mest truverdige frå dette miljøet i vårt land. Tøft liv, sosiale avvik, håp, motstridande tiltrekkingar – alt levert med beats og stil ein konge verdig, hevdar Festidalen.

 

Fagernes Yacht Klubb

Artikkelen held fram under annonsen.

Arrangørane lovar sydenstemning, opne skjorter og ein lang og sveitt hit-parade når Fagernes Yacht Klubb går på scenen nest sist laurdag kveld. Publikum får høyra alt frå Lionel Richie til Toto. – Dette vert ein stor dose lettbeint synth, ein dæsj frekk gitarsolo, ein heil del småerotisk saksofon, ein neve pulserande bass, ein god kvast nydeleg koring og euforisk allsong, ventar Festidalen. – Det er ikkje ofte Festidalen hyrer inn coverband. Det kjem heller ikkje til å bli ein ny trend. Men med Fagernes Yacht Klubb tilgjengelege, kjendest det rett og slett umogleg å motstå. Dette er tidenes partydrink, lovar Festidalen.

 

Raga Rockers

Det blir garantert stor stemning på Dønhaug-jordet når ein av dei fire store innan norsk rock går på scenen for å avslutta Festidalen 2018. Bandet vart grunnlagt i 1982, og har håva inn mange prisar og nominasjonar til prisar sidan det. Festidalen meiner bandet står breibeint og støtt i både fortida og framtida til rockesjangeren. – Klassiske låtar og kronisk skråblikk levert av Kong Krohn i front gjev alltid ei sterk oppleving. Dette vert storstått, meiner dei.