Marion Skogseth vann Lambasleppet i fjor. På fredag slepper ho singel under artistnamnet Marion Woodseth. (Arkivfoto)

Slepper singel på fredag

Marion Skogseth Bjørsvik frå Valen slepper sin første singel ”Stjernebilde” 23.februar. Ho gler seg til å endeleg få visa fram låten ho spelte inn i New York i fjor vår.

– Det skal bli veldig herleg å få det ut, eg har spela ein del live i det siste, og folk har spurd kor dei kan høyra musikken min. Endeleg kan eg visa det fram, seier Marion på telefon frå studiestaden Kristiansand,der ho for tida tek ein master i Music Management ved Universitetet i Agder.

 

Artikkelen held fram under annonsen.

Woodseth

Marion har teke artistnamnet Woodseth, ei direkte oversetjing av mellomnamnet Skogseth. Sjølv om den første låten kjem ut på norsk, har denne jenta ambisjonar om større marknadar enn den norske.

– Det første året kjem det berre låtar på norsk, med slepp både før sommaren og til hausten, i tillegg til dette som kjem no på fredag. Neste år satsar eg på å sleppa engelske låtar. Eg kjem nok til å gjera begge deler på sikt, men først vil eg etablera meg med norske tekstar. Men skal ein ut i verda så er ein litt låst om ein berre syng på norsk, seier Marion.

«Stjernebilde» er ein poplåt med inspirasjon frå synth-musikken på 80-talet. Etter innspelinga i april i fjor har han blitt miksa og mastra heime i Noreg til han fekk det ønska uttrykket.

– Målet er å skilja seg ut samstundes som ein treff breitt. Eg vil at folk skal høyra at dette er Marion, seier artisten som vann Lambasleppet her heime i fjor sommar.

 

Sleppefest

Ho rosar produsenten for samarbeidet, både i New York og Noreg.

Artikkelen held fram under annonsen.

– Eg har vore heldig med folka rundt meg, og har tru på låten. I det siste har eg fått veldig mange gode tilbakemeldingar, men det står att å få folk til å høyra på musikken min, seier ho.

«Stjernebilde» skal sleppast digitalt, og vera tilgjengeleg via alle strøymetenester.

– Skal du ha nokon sleppefest?

– Det vert ein slags release i Kristiansand 13. april. Då skal eg varma opp for Julie Bergan, fortel den lovande artistspira.

Vonleg vil vi høyra meir frå den talentfulle dama i åra som kjem.