– Slå saman seniorlaga

Han er så engasjert på vegner av Kvinnherad-fotballen at han nærast dirrar. Og Johnny Furdal er klokkeklar på kva han meiner må til.

– Kvifor ha eit seniorlag viss du ikkje klarer å stilla lag? spør Johnny Furdal.

Han er forskrekka over at Halsnøy ikkje har spelarar tilgjengeleg til å avvikla første serierunde, og kanskje må trekkja seniorlaget frå 5. divisjon. Konsekvensen meiner han er openberr: Halsnøy bør slå seg saman med Trio.

– Det er ti minutt å køyra gjennom tunnelen og til stadion på Husnes. Kvifor ikkje slå laga saman? Då hadde ein hatt stor treningsgruppe og rikeleg med spelarar til å drifta to seniorlag, påpeikar Johnny Furdal.

 

Fusjon

Omvikdelingen er for tida den største Kvinnherad-profilen på fotballbanen, og innimellom overbevisande skotfintar og lekre målgjevande pasningar har han hatt tid til å få med seg korleis to av seniorlaga i kommunen har slite med å stilla lag i somme av treningskampane sine. Han har til og med dratt på seg Rosendal-trøya og hjelpt til då moderklubben Rosendal var i mild mannskapsmangel før møtet med Tyssedal i januar.

– No har ein eit gyllent høve for Halsnøy og Trio til å slå saman laga. Ungdommane treng eit lag å sjå opp til, eit lag som har ein god struktur og treningskvardag. Det får du ikkje med sju spelarar på trening, slår han fast.

Helst ser han at Rosendal hadde slengt seg på ein slik fusjon også.

 

Trenar lite

– For 15 år sidan hadde me tre lag i 3. og 4. divisjon her i kommunen. Endringar i divisjonssystemet gjer at ein kan samanlikna det med dagens 4. og 5. divisjon. Den divisjonsendringa seier mykje om korleis seriøsiteten i desse divisjonane er om dagen. Det er meir eller mindre slutt på alkohol i helgane på desse nivåa også. 4. divisjon blir ein flott arena for Trio, eit lag frå Kvinnherad kan ikkje liggja høgare, meiner Furdal, som trur Trio kjem til å gjera det godt i år.

Den auka seriøsiteten i fotballen, også på breiddenivået, speglar seg mellom anna igjen i treningsmengd.

– Tre treningar i veka er ikkje lite, men heller ikkje mykje. Stord og Lysekloster i 3. divisjon ligg på fire-fem treningar i veka. Utviklinga i Rosendal er at ein trenar mindre enn før, mange ned i éin gong i veka. All æra til trenar Trond Inge Haugland for å stå i dette, for det er ikkje lett å vera trenar når spelarar ikkje kjem på trening og kamp. I staden for å gå på trening, vel ungdommen i dag å jobba eller lesa på ein prøve dei skal ha om tre veker. Spelarar likar at det er seriøst, då stiller dei opp og har det kjekkare enn når ein ikkje legg noko i det. Men det igjen startar med at spelarar er på trening, seier Furdal.

Midtbaneesset tykkjer det er bra at kvar klubb har breidda med seg, spesielt opp til 16-årsalderen.

– Men kor blir alle spelarane av etter at dei er ferdige med tiandeklasse? Det er fornuftig å reisa på fotballgymnas, men alle gjer ikkje det. Eg ser at det å ha juniorlag er på veg ut i Bergensområdet. Ungdommane heller spelar på andrelaga til klubbane, i 5. eller 6. divisjon. Dei beste tenåringane er naturleg nok på førstelaga, seier han.

– Motivasjonen og drifta til å spela og prestera, må ha god grobotn. Det får det ved at dei unge spelarane spelarane har eit seniorlag å sjå opp til og strekkja seg mot. I Kvinnherad vil ein best få det til om ein samlar kreftene om eitt topplag, sluttar Furdal.