Skyss snur – tek tilbake kveldsavgang til Varaldsøy 

Til stor misnøye for innbyggjarar på Varaldsøy var 20.40-avgangen frå Gjermundshamn til Varaldsøy fjerna frå ferjerutene i 2020. No snur Skyss og tek den tilbake.

– Vi har jobba for å få på plass det stjernestoppet som var fjerna, og no har eg nettopp fått stadfesta frå Skyss at dei tek det tilbake, seier ordførar Hans Inge Myrvold.

I Grenda på torsdag kunne du lesa om dei to lovande volleyballspelarane Stine N. Våge og Solvåg G. Skjelnes som fortvila over at 20.40 avgangen frå Varaldsøy til Gjermundshamn var vekke frå det nye rutetilbodet i 2020.

– Den 20.40-ferja bør vera der. Har vi den så er livet perfekt, har vi den ikkje så vil det gå utover skule, trening og det sosiale, sa Solvår til Grenda onsdag.

Det betyr at både ho, Stine og dei andre på Varaldsøy no kan gå helga i møte med eit smil. Det gjer også ordførar Myrvold.

– Det er veldig viktig for oss at vi kan ha eit så godt rutetilbod som mogleg, og dette er ein avgang som mange nyttar seg av. Som vi kunne lesa i Grenda på torsdag så er den mykje brukt av unge idrettsutøvarar som skal trena volleyball, men også pendlarar og andre brukar denne ruta. Så at vi no har fått stadfesta at dei hentar denne stjernestoppen tilbake er veldig gode nyhende, seier han.

Om avgangen får nøyaktig same klokkeslett som tidlegare er usikkert, men den vil koma rundt det same tidspunktet.